Pas PDK-së, edhe LDK-ja procedon në Kushtetuese Ligjin për KPM-në, KPK-në dhe vendimin për statutin e UP-së
Shefi i Grupit Parlamentar të Lidhjes Demokratike të Kosovës, Arben Gashi, në emër të partisë ka dërguar sot në Gjykatën Kushtetuese Ligjin për Komisionin e Pavarur të Mediave, Ligjin për Këshillin Prokurorial të Kosovës dhe vendimin për statutin e Universitetit të Prishtinës. Gjatë së enjtes, i dërgoi edhe Partia Demokratike e Kosovës.
Sipas Gashit, Ligji për KPK-në rrezikon rendin kushtetues.
“Kemi punuar edhe në Ligjin për KPM-në, i cili synon të kontrollojë mediat online dhe synon të prishë balancat juridike në Kosovë”, u shpreh Gashi.
Gashi tha se edhe vendimi për statutin e Universitetit të Kosovës është në kundërshtim me Kushtetutën prandaj e kanë proceduar në Kushtetuese.
“Edhe ky vendim shkel Kushtetutën e Kosovës”, u shpreh ai.
Dje, në cilësinë e Shefit të Grupit Parlamentar të Partisë Demokratike të Kosovës, Abelard Tahiri, ka dërguar sot në Gjykatën Kushtetuese Ligjin për Komisionin e Pavarur të Mediave, Ligjin për Këshillin Prokurorial të Kosovës dhe vendimin për statutin e Universitetit të Prishtinës.
“Kemi proceduar tri beteja të reja në Gjykatën Kushtetuese”, u shpreh Tahiri para mediave.
PDK-ja, tha ai, konsideron se tri nismat e miratuara në Kuvendin e Kosovës, 2 ligje dhe një vendim janë në kundërshtim të plotë me Kushtetutën e Kosovës.
Për KPM-në, tha Tahiri, “është ligj nëpërmjet të cilit tentohet të kontrollohet puna e mediave të lira dhe të cenohet fjala e lirë”.
“Kanë shkuar aq larg sa që tentohet të kontrollohen edhe individë fizikë”, tha ai.
Për Ligjin për KPK-në, tha ai, “nuk dihet arsyeja e këtij pushteti që bën punën e njëjtë, dhe me këtë ligj, pushteti aktual po tenton të kapë sistemin prokurorial”.
“E treta, që kemi proceduar, është vendimi për statutin e UP-së. Ua ka mohuar të drejtat stafit akademik në UP”, tha Tahiri.
Ai shtoi se është nismë që bie në kundërshtim me Kushtetutën e Republikës së Kosovës.
“Presim të dalim fitues”, u shpreh Tahiri.
