Panairi i Librit 2022!
Siç e do tradita ku për më shumë se 21 vjet tashmë edhe këtë vit do të organizohet panairi i librit. Në vititn 2020 dhe 2021 panairi nuk është mbajtur për shkak të pandemisë COVID-19. Ky panair është një nga eventet më të rëndësishëm dhe një nga ngjarjet më të mëdha për lexuesit në radhë të parë, botuesit, përkthyesit dhe autorët
Ky panair mbështetet nga Ministria e Kulturës, Rinisë dhe Sporteve ndërsa organizohet nga Shoqata e Botuesve Kosovarë.
Edicioni i 22-të i panairit të librit në Kosovë fillon me moton “Libri mbron mendjen”.
Panairi do të mbahet nga 7 deri më 12 qershor 2022, në ambientet e Pallatit të Rinisë në Prishtinë, i cili organizohet nga Shoqata e Botuesve të Kosovës.
Hapja e Panairit të Librit do të transmetohet në televizionin publik më 7 qershor në orën 12:00.
Panairi do të jetë i hapur për vizitorë çdo ditë nga ora 9:00 deri në 20:00.
Nga Shoqata e Botuesve të Kosovës, bëhet e ditur se hyrja për vizitorë është pa pagesë. Sipas tyre, këtë vit do të marrin pjesë rreth 100 botues nga Kosova, Shqipëria, Maqedonia e Veriut dhe diaspora.
Në këtë panair do të jenë 2000 tituj të rinj dhe 6000 tituj të viteve të fundit.
“Panairin pritet ta vizitojnë rreth 40000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale e Kosovës”, thuhet në njoftim të SHBK-së.
“Ky panair përkon edhe me përvjetor të rëndësishëm që do të shënohen me aktivitete, përkujtime e debate. Do të jenë të pranishëm shkrimtarë ndërkombëtarë e kombëtarë, profesionistë të librit, botues, përkthyes e librarë”, thuhet në njoftimin e Shoqatës së Botuesve të Kosovës.
