PAMJET/ Stadiumi më i madh në botë s’do të presë finalen e Kupës së Botës 2030!
Edhe pse po ndërtohet posaçërisht për Kupën e Botës 2030 dhe pritet të jetë stadiumi më i madh në botë, Grand Stade Hassan II në Marok nuk do të presë finalen e këtij turneu madhështor.
Kupa e Botës 2030 do të shënojë 100-vjetorin e edicionit të parë të Botërorit të zhvilluar në vitin 1930 dhe për herë të parë do të mbahet në tri shtete: Spanjë, Portugali dhe Marok, duke u shtrirë në dy kontinente.
Maroku ka shpallur vitin e kaluar planet për ndërtimin e një stadiumi ultramodern me kapacitet 115,000 ulësesh, në provincën Benslimane, në lindje të Casablancës. I quajtur Grand Stade Hassan II, ky kompleks sportiv do të ketë 32 shkallë hyrëse, kopshte botanike dhe një zonë të madhe rekreative prej 100 hektarësh.
Punimet për këtë projekt kolosal kanë nisur dhe pritet të përfundojnë në vitin 2027, një vit përpara afatit fillestar të planifikuar. Megjithatë, sipas asaj që raporton prestigjiozja spanjolle Marca, finalja e Kupës së Botës nuk do të luhet në këtë stadium, por në “Santiago Bernabeu” të Madridit, me kapacitet 85,000 vende.
Në garë për finalen ishin gjithashtu Camp Nou i Barcelonës dhe vetë Grand Stade Hassan II, por sipas raportimeve, FIFA ka arritur marrëveshje me Real Madridin, duke ia dhënë nderin stadiumit madrilen.
Rreth 400 milionë paund pritet të shpenzohen për ndërtimin e Grand Stade Hassan II dhe zhvillimin e infrastrukturës përreth tij. Arkitektura e stadiumit përfshin skaje në formë “tasash” për përmirësimin e përvojës së tifozëve, pesë nivele mikpritjeje për VIP-at, si dhe 12,000 suita luksoze e një “tribunë mbretërore”.
Dizajni i veçantë i stadiumit është frymëzuar nga çadrat tradicionale marokene “Moussem”, sipas studios arkitekturore Populous. Pamjet konceptuale tregojnë një strukturë të mbuluar me fletë alumini gjysmë të tejdukshme, për të lejuar depërtimin e dritës natyrale, duke krijuar një përvojë unike për tifozët. /KJ/
stadiumi 1
TRENDING NE RRJET
Moderato
