Osmani e Kurti pranojnë çmimin “Alumni i Nderit” nga rektori i UP-së
Presidentja e Kosovës, Vjosa Osmani, dhe kryeministri në detyrë, Albin Kurti, janë nderuar me çmimin “Alumni i Nderit” nga Universiteti i Prishtinës (UP). Ceremonia e dorëzimit të çmimit u mbajt në një ngjarje të veçantë, ku rektori i UP-së, Arben Hajrullahu, shprehu emocionet dhe mirënjohjen për të dy udhëheqësit e shtetit.
Në fjalën e tij, rektori Hajrullahu theksoi rëndësinë e pranisë së presidentes Osmani dhe kryeministrit Kurti në këtë ceremoni, duke e cilësuar si një akt të madh të përkushtimit ndaj universitetit. “Brenda një jave ata gjetën kohën të vijnë dhe të nderojnë Universitetin e Prishtinës. Ky është një sinjal i rëndësishëm për të gjithë ne, sepse tregon se sa i rëndësishëm është ky universitet për liderët tanë, të cilët, pavarësisht angazhimeve të tyre, gjejnë mundësinë të jenë gjithmonë pjesë e këtij tempulli të dijes,” u shpreh rektori.
Hajrullahu gjithashtu theksoi se Universiteti i Prishtinës ka nxjerrë personalitete të shquara, si presidentja Osmani dhe kryeministri Kurti, të cilët, siç tha ai, kanë bërë dhe vazhdojnë të bëjnë krenarë Kosovën dhe universitetin brenda dhe jashtë vendit.
Gjatë fjalës së saj, presidentja Osmani shprehu emocionet e saj për rikthimin në Universitetin e Prishtinës. “Ka diçka thellësisht të bukur në rikthimin e një ish-studenti në universitetin e tij. Të rikthehesh këtu dhe të pranojsh një nder nga ky tempull i dijes është një emocion që nuk mund ta përshkruaj lehtë,” tha Osmani, duke theksuar rëndësinë e arsimit dhe përkushtimit ndaj dijes.
Në fjalën e tij, kryeministri Kurti e cilësoi këtë nderim si një lidhje të ngushtë me të kaluarën dhe të ardhmen e universitetit. “E shoh veten të afërt dhe të lidhur me të shkuarën dhe të ardhmen e Universitetit të Prishtinës. Ky universitet e ndan historinë e Kosovës në dy periudha – Prishtina para dhe pas themelimit të universitetit të saj. Po ashtu, fati i Kosovës është i pandarë nga fati i Universitetit të Prishtinës,” tha Kurti, duke shtuar se ky universitet duhet të jetë një nga më të mirët në rajon dhe në botë. “Është detyra jonë ta bëjmë këtë universitet më të lartin në rajon, për të ndihmuar në zhvillimin dhe forcimin e Kosovës,” përfundoi ai.
