Një Rumun do të gjykojë ndeshjen Serbi-Shqipëri
Arbitri rumun István Kovács është caktuar si gjyqtari kryesor për ndeshjen e shumëpritur mes Serbisë dhe Shqipërisë, e vlefshme për eliminatoret e Kupës së Botës.
Ky do të jetë debutimi i tij në një takim kualifikues për këtë kompeticion, një moment i veçantë për 41-vjeçarin që është pjesë e grupit “Elite” të UEFA-s.
Në këtë përballje, Kovács do të ketë përkrah dy ndihmësit e tij nga Rumania, Mihai Marica dhe Ferencz Tunyogi, ndërsa gjyqtari i katërt do të jetë Horatiu Fesnic. Ndërkohë, në sistemin VAR do të jenë gjermanët Bastian Dankert dhe Pascal Muller.
Ndeshja do të luhet të shtunën në orën 20:45, në stadiumin “Dubocica” në Leskovac, në kuadër të Grupit K.
István Kovács është arbitër ndërkombëtar që nga viti 2010 dhe ka ndërtuar një karrierë të shkëlqyer në arenën europiane. Ai ka gjykuar takime të rëndësishme në kompeticionet më të mëdha, përfshirë finalen e parë të UEFA Europa Conference League në vitin 2022 në Tiranë (Roma – Feyenoord), finalen e Europa League në vitin 2024 (Atalanta – Bayer Leverkusen) dhe kulmoi me gjykimin e finales së UEFA Champions League në maj 2025 mes PSG dhe Interit.
Kovács njihet për stilin e tij të rreptë dhe autoritetin e lartë në fushë.
/tvklan.al
