Nisen për në Vjenë qytetarët që fituan udhëtimin e parë falas nga Qeveria
Kryeministri Albin Kurti nga Aeroporti Ndërkombëtar i Prishtinës “Adem Jashari”, ka uruar sërish qytetarët e Kosovës për heqjen e vizave.
Grupi i parë që udhëtojnë pa viza janë për fituesit e kuizit të Bashkimit Evropian, që është organizuar në kuadër të fushatës informuese të Qeverisë së Kosovës lidhur me liberalizimin e vizave.
Kosova i bashkohet të gjitha vendeve që udhëtojnë pa viza në Bashkimin Evropian. Nga sot qytetarët e Kosovës do të udhëtojnë pa viza, duke shmangur kështu pritjet e gjata para zyrave të ambasadave të huaja për një vizë, e as nuk do të shpenzojnë për termine e pagesë vizash.
Kryeministri Albin Kurti dhe zëvendëskryeministrja Donika Gërvalla kanë mbajtur një konferencë për media në Aeroportin Ndërkombëtar të Prishtinës “Adem Jashari”, në ditën e parë të liberalizimit të vizave.
Kurti ka thënë se pritjet kanë qenë të gjata dhe qytetarët janë privuar nga shumë mundësi.
“Kjo ditë është e rëndësishme. Po hiqet një padrejtësi e madhe dhe po fitohet edhe një e drejtë e madhe. Bashkë me të po forcohet edhe pasaporta jonë. Forcimi i dokumenteve tona të udhëtimit, është forcim i dinjitetit tonë si shtet në arenën ndërkombëtare. 50 qytetarë do të udhëtojnë për në Vjenë, ata e fituan këtë të drejtë në kuadër të fushatës tonë informuese. Për herë të fundit, urime liberalizimi i vizave”, ka thënë ai.
