![Në kuadër të aktiviteteve të 25-vjetorit të çlirimit të Kosovës, në Muzeun Kombëtar të Kosovës është hapur ekspozita fotodokumentare “KFOR dhe Kosova +25”.](https://tvgjilani.com/wp-content/uploads/2024/06/448130774_862697489236981_3776508405772327706_n-850x560.jpg)
Në kuadër të aktiviteteve të 25-vjetorit të çlirimit të Kosovës, në Muzeun Kombëtar të Kosovës është hapur ekspozita fotodokumentare “KFOR dhe Kosova +25”.
Ekspozita përfshinë një fotodokumentar unik nga fotografi skocez Nick Sidle, i realizuar në Kosovë në vitin 2000-2001, duke treguar jetën dhe punën e paqeruajtësve të KFOR-it.
![](https://tvgjilani.com/wp-content/uploads/2024/04/vali-ranch-2.jpg)
Ajo paraqet një periudhë historike të rëndësishme dhe ofron një pasqyrë unike në jetën dhe punën e paqeruajtësve, si dhe ndikimin e tyre në Kosovë dhe përtej, duke theksuar rëndësinë e bashkëpunimit ndërkombëtar për të siguruar paqen dhe stabilitetin.
![](https://tvgjilani.com/wp-content/uploads/2024/06/448139726_862697729236957_8985515536372444203_n.jpg)
![](https://tvgjilani.com/wp-content/uploads/2024/06/448132195_862697555903641_4182014954072334285_n.jpg)
![](https://tvgjilani.com/wp-content/uploads/2024/06/447964433_862697882570275_8808842668893033810_n.jpg)
Të pranishëm në hapje të ekspozitës dhe folës ishin kryeministri Albin Kurti, ish-sekretari i përgjithshëm i NATO-s, Lord George Robertson dhe ambasadori i Mbretërisë së Bashkuar në Kosovë, Jonathan Hargreaves.
Kryeministri Kurti tha se ekspozita na sjell kontrastin e çnjerëzores së një regjimi dhe bukurisë së hirshme të njerëzimit, që krahas mbajtjes së gjallë të kujtimeve është edhe informues dhe frymëzuese për brezat e rinj. Ai falënderoi dhe vlerësoi rolin e NATO-s në mbështetje të Kosovës, duke pohuar se ky foto-dokumentim unik i fotografit dhe gazetarit Nick Sidle është një testament për guximin dhe sakrificat e atyre që kanë kontribuar për paqe në vendin tonë.
Ndërkaq Robertson u kthye pas në kohë, duke kujtuar vendimin historik për ndërhyrjen e NATO-s për të dëbuar forcat serbe nga Kosova. Ai theksoi se 25 vjet më parë ishte një kohë shumë e vështirë, pasi siç tha i ishin kundër një armiku të fuqishëm dhe nuk e kishin as rezolutë të KS OKB-së për të ndërhyrë, por që ministrat e atëhershëm të 19 vendeve të NATO-s morën vendimin e madh që forcat e Slobodan Millosheviqit të dëboheshin.
Ndërsa drejtoresha e Heartstone, Sita Kumari, e cila ka menaxhuar këtë projekt, ka folur për sfondin historik, mënyrën se si u mblodhën materialet dhe rolin e tyre në atë kohë dhe sot.
Të pranishëm në këtë ngjarje ishin edhe ministri Hajrulla Çeku, ministrja e Jashtme Donika Gërvalla, ministri Xhelal Sveçla, ministrja Rozeta Hajdari, ushtruesja e detyrës së drejtorit të Muzeut Kombëtar të Kosovës, Vjollca Aliu dhe deputetë.
Gjithashtu në ngjarjen online kanë marrë pjesë fotografi Nick Sidle, drejtori i UNA Scotland, dr. Gari Donn dhe drejtori i Interfaith Scotland, dr. Maureen Sier, të dy organizatat partnere me Heartstone për këtë nismë, Lord David Hannay – kryetar i Grupit të Përbashkët Parlamentar, Dhomat e Parlamentit të Mbretërisë së Bashkuar, Lord Clive Soley dhe gjeneral Sir Nicholas Carter – Komandanti i parë i Batalionit të 2-të të Royal Green Jackets në Prishtinë në vitin 1999, veteranë nga imazhet që janë gjurmuar për të ndarë përvojat e tyre pas 25 viteve dhe përfaqësues të regjimenteve të paraqitura në fotodokumentar.
Lord George Robertson mori dhuratë nga Muzeu Kombëtar një figurë të kokës antropomorfe të terrakotës që është pjesë e koleksionit arkeologjik të Kosovës, por që në mënyrë të paligjshme origjinali i saj po mbahet në Serbi, të cilën ia dorëzoi ministri Çeku.
![](https://tvgjilani.com/wp-content/uploads/2023/11/libertas2.jpg)