Në 80-vjetorin e lindjes, do të promovohet libri që pasqyron portretin e Ibrahim Kadriut
Në nderim të 80-vjetorit të lindjes së Ibrahim Kadriut, këtë të Shtunë, do të bëhet promovimi i librit të ri, të përgatitur nga një grup autorësh. Në mbi 200 faqe janë mbledhur shkrime që pasqyrojnë portretin e tij krijues, veprën letrare dhe intervistat e dhëna gjatë muajve të fundit.
Me këtë rast, kryetari i Komunës, Alban Hyseni, do t’ia urojë titullin “Qytetar Nderi”, i cili para pak kohësh iu nda nga Asambleja e Komunës së Gjilanit!
“Ju ftojmë të merrni pjesë në këtë tubim festiv, ku do të përkujtohet rruga e tij letrare dhe do të ndahen fjalë vlerësimi për krijimtarinë e tij, e cila ka shoqëruar dhe frymëzuar shumë breza”, thuhet në njoftim.
Promovimi bëhet më 13 dhjetor, në ora 12:00, në Bibliotekën e Qytetit “Fan S. Noli”, në Gjilan.
