Ndërroi jetë veterani i arsimit, Salih Hasani

Shkolla e Mesme e Ultë “Musa Zajmi” në Gjilan ka njoftuar me pikëllim të thellë ndarjen nga jeta të veteranit të arsimit, Salih Hasani, duke vlerësuar lart kontributin e tij shumëvjeçar në edukimin dhe arsimimin e gjeneratave të tëra.

Ndarja nga jeta e Salih Hasanit ka prekur thellë jo vetëm familjen dhe të afërmit e tij, por edhe komunitetin arsimor të Gjilanit e më gjerë.

I njohur për përkushtimin, urtësinë dhe etikën profesionale, ai ishte një nga figurat e respektuara të arsimit lokal, kontributi i të cilit ka lënë gjurmë të qëndrueshme në formimin e shumë gjeneratave.

Njoftim Mortor
Shkolla e Mesme e Ultë “Musa Zajmi” – Gjilan

Me dhimbje të madhe njoftojmë se u nda nga jeta Salih Hasani, veteran i arsimit, edukator i përkushtuar dhe shembull i njeriut të urtë, punëtor dhe të respektuar.

I ndjeri Salih Hasani i kushtoi mbi 40 vite të jetës së tij shërbimit në arsim, duke edukuar breza të tërë nxënësish me dashuri, përgjegjësi dhe profesionalizëm të lartë.

Ai kontribuoi jo vetëm si mësimdhënës, por edhe si drejtor dhe zëvendësdrejtor i shkollës në vitet e mëparshme, duke lënë gjurmë të pashlyeshme në zhvillimin e institucionit tonë arsimor dhe në komunitetin më të gjerë.

Puna dhe vepra e tij do të mbeten përherë të çmuara, ndërsa kujtimi i tij do të jetojë në zemrat e kolegëve, nxënësve dhe të gjithë atyre që patën fatin ta njohin dhe të punojnë me të.

Shprehim ngushëllimet më të sinqerta familjes Hasani, miqve dhe gjithë komunitetit shkollor.

U prehtë në paqe!