Nazim Gagica në Bujanoc: “Do të ndërtojmë ura lidhëse që shqiptarët e Luginës të mos jenë të diskriminuar”
“Sot, bashkë me anëtarin e kryesisë së AAK-së në Gjilan, afaristin e humanistin nga Gjermania, Ilmi Mustafa, vizituam Komunën e Bujanocit ku u mirëpritëm nga nënkryetari i saj, njëkohësisht kryetari i Lëvizjes së Progresit Demokratik, Shqiprim Musliu”, ka bërë me dije Nazim Gagica, kryetari i Aleancës për Ardhmërinë e Kosovës (AAK), dega në Gjilan.
Ai bëri me dije se në këtë takim u diskutua përgjithësisht për jetën e qytetarëve të Luginës, për proceset politike dhe me theks të veçantë për bashkëpunimin ndërmjet komunave të Luginës dhe Anamoravës, veçmas Gjilanit.
Komuna e Gjilanit – Dëgjim Publik për punësim të personave me nevoja të veçanta
“Përveç pozitës gjeografike, bashkëpunimin dhe bashkërendimin ndërmjet nesh e imponojnë edhe lidhjet e shumta ndërmjet shqiptarëve prej kohësh. Pjesa më e madhe e të shpërngulurve nga Lugina është në Gjilan tani e sa vjet. Një pjese e tyre tanimë kanë edhe biznese të suksesshme dhe janë storie suksesi. Do të ndërtojmë ura lidhëse edhe në të ardhmen në mënyrë që shqiptarët e Luginës të mos jenë komunitet i diskriminuar për shkak të proceseve të tejzgjatura dialoguese ndërmjet Kosovës dhe Serbisë”, ka thënë Nazim Gagica, kryetar i AAK-së së Gjilanit.
