Moskonstituimi i Kuvendit bllokon pagat në RTK, Sindikata e punëtorëve paralajmëron protesta

Sindikatat e Punëtorëve të RTK-së është shprehur e shqetësuar për mosshpërndarjen e mjeteve buxhetore për gjashtëmujorin e dytë të vitit, për shkak të moskonstituimit të Kuvendit të Kosovës, derisa kanë paralajmëruar protesta nëse nuk ndodh ekzekutimi i pagave, 

“Punonjësit e RTK-së rrezikojnë që këtë muaj të mbesin pa paga, ndonëse për shumicën e tyre RTK-ja është i vetmi vend pune dhe burim i të ardhurave, ndërkohë që kanë edhe obligime të rregullta financiare dhe kreditore.

Kërkojmë në mënyrë urgjente nga institucionet përgjegjëse dhe ato në detyrë të bëjnë shpërndarjen e buxhetit për gjashtëmujorin e dytë, në mënyrë që të mos rrezikohet as ekzistenca e pagave e as funksionimi i transmetuesit publik.

Nëse një gjë e tillë nuk ndodh, paralajmërojmë se do të dalim në protesta për të kërkuar këtë të drejtë tonën të garantuar me ligj, dhe për të mbrojtur transmetuesin e vetëm publik në vend.

E plotë:

Kryesia e Sindikatës së Punëtorëve të RTK-së shpreh shqetësim të thellë për situatën e krijuar pas mosshpërndarjes së mjeteve buxhetore për gjashtëmujorin e dytë të vitit për RTK-në, si pasojë e moskonstituimit të Kuvendit të Kosovës. Punonjësit e RTK-së rrezikojnë që këtë muaj të mbesin pa paga, ndonëse për shumicën e tyre RTK-ja është i vetmi vend pune dhe burim i të ardhurave, ndërkohë që kanë edhe obligime të rregullta financiare dhe kreditore. Kërkojmë në mënyrë urgjente nga institucionet përgjegjëse dhe ato në detyrë të bëjnë shpërndarjen e buxhetit për gjashtëmujorin e dytë, në mënyrë që të mos rrezikohet as ekzistenca e pagave e as funksionimi i transmetuesit publik. Nëse një gjë e tillë nuk ndodh, paralajmërojmë se do të dalim në protesta për të kërkuar këtë të drejtë tonën të garantuar me ligj, dhe për të mbrojtur transmetuesin e vetëm publik në vend. RTK është i rregulluar me Kushtetutë, dhe pengimi i funksionimit të saj përbën shkelje ligjore me pasoja ligjore. Si Sindikatë, do të ndërmarrim të gjitha veprimet e nevojshme për të mbrojtur dinjitetin e kolegëve tanë dhe për të kërkuar kushte më të mira për punën e tyre. Është e papranueshme që, përveç faktit që nuk ka rritje të pagave në RTK, tash po rrezikojmë të mbesim edhe pa këto paga që marrim, nëse nuk bëhet shpërndarja e buxhetit për gjashtëmujorin e dytë. I bëjmë thirrje institucioneve të veprojnë menjëherë dhe të mos e fusin në kolaps një institucion publik të rëndësisë së veçantë për shoqërinë dhe demokracinë në vend. Po ashtu, i bëjmë thirrje të gjithë punonjësve të RTK-së që të na mbështesin fuqishëm në veprimet sindikale që do të ndërmarrim brenda këtyre ditëve, për të mbrojtur të drejtat tona dhe funksionimin normal të RTK-së. Me respekt, Kryesia e SPERTK-së Prishtine, 18.7.2025