Mobilizohen “Intelektualët”, ftojnë tifozërinë të bëjë lojtarin e 12-të, ndaj Llapit në Podujevë
Tifo – Grupi “Intelektualët” është mobilizuar që nga dita e hënë, 1 maj, për të mbështetur skuadrën e zemrës në rrugëtimin e saj të mbetur drejt tiitullit të kampionit në Albi Mall superligën e Kosovës në Futboll.
Ata, “Intelektualët”, përmes rrjeteve sociale kanë apeluar te “armata” e tifozërisë që të udhëtojnë në Podujevë në ndeshjen e javës 32-të, të vlefshme për finishin e garave të mbetura në Albi Mall Superligën e Kosovës, drejt titullit të kampionit.
“Të Enjten, DRITA bashkë me Intelektualët do të shëndrrisin në Podujevë, në betejën tjetër, të pestën nga fundi, në synimin madhor për një tjetër trofe në sirtarët tanë!
Këtë të Enjte, ftoheni të gjithë, pa dallime, çdo Intelektualë dhe çdo djalë i qytetit, të udhëtojmë së bashku në Podujevë, të përkrahim lideren aktuale të kampionatit, ngase tani është momenti më vendimtar i sezonit, ku DRITA ka shumë nevojë për formacionin me 12 lojtarë, e lojtari i 12-të jemi ne, sepse Krenaria e Qytetit kurrë nuk ka ecur vetëm!”, thuhet në njoftimin e klubit në faqen e saj në facebook.
Kujtojmë që FC Drita ka “rrëmbyer” sërish pozitën e liderit, pas javës 31-të, si dhe pas një “odiseiade” pranverore në këtë rrugëtim së bashku me Ballkanin, si pretendente serioze, me synime të njejta, për titull!
Disa herë me radhë renditja tabelare ka pësuar ndryshime në kreun e saj, pasi herë njëra e herë tjetra skuadër ka pasur devijime në ndeshje të caktuara, të cilat jo rrallë i ka shfrytëzuar pala tjetër.
Ngjashëm ishte rasti i javës së kaluar, të xhiros 31-të,` kur Ballkani barazoi ndaj Dukagjinit (1:1), që ia krijoi mundësinë e artë skuadrës gjilanase të “rrëmbej” edhe një herë pozitën e liderit, kur kanë mbetur 5 ndeshje për t’u zhvilluar deri në fund të kampionatit, njëra nga të cilat do t’i përballë këto dy skuadra drejtpërdrejtë.
Se cili do të jetë epilogu i ndeshjes së javës së 32-të të skuadrës së Drites kundër Llapit, më 4 maj; si dhe takimi kundër rivalit të drejtpërdrejtë, Ballkanit, javën pasuese të 33-të, në Stadiumin me bari sintetik në Gjilan, mbetet të shihet.
Ndërsa, tifozët “Intelektualët” e presin me padurim takimin ndaj Ballkanit, para atij takimi gjërat mund të marrin kahje tjetër këtë të enjte, duke qartësuar mjaft gjëra, pasi skuadra nga Theranda e ka edhe një “sprovë” tejet të vështirë: ajo në stadiumin e saj zhvillon njërën nga ndeshjet e cilësuara të vështira, kundër Prishtinës, e cila po bënë tentativat e fundit për një pozitë që e shpie në gara europiane.
