Menaxhmenti i FShS-së mori pjesë në Punëtorinë për Barazinë Gjinore në AL në Kosovë
Programi SHER organizoi Punëtorinë mbi Barazinë Gjinore në Arsimin e Lartë në Kosovë, duke mbledhur një grup të gjerë akterësh të përkushtuar për avancimin e barazisë gjinore dhe përfshirjes në sistemin e Arsimit të Lartë në vend.
Punëtoria shërbeu si një platformë e rëndësishme për prezantimin e gjetjeve të Vlerësimit Bazë mbi Mekanizmat e Barazisë Gjinore në institucionet publike të Arsimit të Lartë në Kosovë. Pjesëmarrës nga Universiteti Publik “Kadri Zeka” ishte Dekani i Fakultetit të Shkencave Sociale Prof. Asoc. Dr. Selim Daku, derisa në takim morën pjesë edhe përfaqësues nga Ministria e Arsimit, Shkencës, Teknologjisë dhe Inovacionit (MASHTI), universitetet tjera publike, Agjencia për Barazi Gjinore në Zyrën e Kryeministrit, UN Women Kosova, Rrjeti i Grave të Kosovës, studentë dhe organizata të shoqërisë civile, të gjithë të bashkuar nga misioni i përbashkët për të promovuar barazinë gjinore në akademi.
Gjatë ngjarjes, pjesëmarrësit zhvilluan diskutime konstruktive të fokusuara në qasje praktike për integrimin e perspektivës gjinore në mësimdhënie, të nxënë dhe kërkime shkencore. Institucionet ndanë përvojat e tyre dhe prezantuan planet ekzistuese apo të sapo-hartuara për Barazinë Gjinore, duke adresuar si arritjet ashtu edhe sfidat në institucionalizimin e saj.
Punëtoria vuri gjithashtu në pah projektet inovative të mbështetura nga Skema e Vogël e Granteve për Dimensionin Social e Programit SHER, si “Gender-Inclusive Design”, “EmpowerHER” dhe “Words Matter”. Këto iniciativa demonstruan mënyra krijuese dhe efektive për ta përfshirë barazinë gjinore në jetën akademike dhe atë të kampusit, duke frymëzuar bashkëpunime të reja dhe përsëritje të mëtejshme të praktikave të mira.
Dekani, Prof. Asoc. Dr. Selim Daku, theksoi rëndësinë e hartimit të një Plani të Veprimit për Barazinë Gjinore në Universitetin Publik “Kadri Zeka” (UKZ), duke e përshkruar atë si një dokument strategjik që do të integrojë perspektivat gjinore në të gjitha politikat, programet dhe praktikat institucionale. Ai vuri në dukje se UKZ tashmë ka një bazë të fortë ligjore dhe rregullative që garanton barazinë gjinore, përfaqësimin e drejtë në rekrutime dhe vendimmarrje, si dhe përfshirjen e rëndësishme të grave në pozita udhëheqëse, akademike dhe administrative.
Dekani gjithashtu prezantoi iniciativën e UKZ-së për të themeluar një Program të Përbashkët Master në Studime Gjinore, në bashkëpunim me Universitetin “Sapienza” të Romës dhe Universitetin e Bankokut, duke e konsideruar atë si një hap të rëndësishëm drejt promovimit të kërkimit shkencor dhe bashkëpunimit ndërkombëtar në fushën e barazisë gjinore. Ai njoftoi se një Grup Punues i gjerë do të themelohet për të hartuar Planin e Veprimit deri në fund të këtij viti kalendarik.
Punëtoria përfundoi me një sesion reflektimi me prirje drejt së ardhmes, duke theksuar nevojën për bashkëpunim të vazhdueshëm, përkushtim institucional dhe përafrim strategjik, në mënyrë që barazia gjinore të bëhet një element përbërës dhe i qëndrueshëm i sistemit të arsimit të lartë në Kosovë.
