Mbretëresha është shfaqur në Pallatin Buckinghampërkrah Familjes Mbretërore si pjesë zyrtare për jubileun e saj Platinum.
Shfaqja e parë e familjes mbretërore në ballkon pas tre vjetësh dukej ndryshe. Hera e fundit që familja u mblodh për të përshëndetur turmën jashtë Pallatit Buckingham ishte në vitin 2019, përpara pandemisë COVID-19, kur në mesin e 17 personave ishte edhe Princi Harry, Meghan Markle dhe Princi Andrew.
Kësaj radhe, të pranishëm ishin vetëm anëtarët e familjes që janë aktualisht pjesë e detyrave mbretërore, të cilët e vendosën Mbretëreshën 96-vjeçare në qendër për festimin e Jubileut Platinum. Të pranishëm ishin Princi Charles dhe Camilla Parker Bowles, si dhe Princi William, Kate Middleton dhe tre fëmijët e tyre.
Më i vogli, Princi 4-vjeçar Louis, ishte më ekspresivi në ballkon dhe në një moment hapi gojën dhe mbuloi veshët ndërsa avionët e zhurmshëm fluturonin sipër.
Disa fytyra më pak të njohura iu bashkuan grupit gjithashtu, përfshirë kushërinjtë e Mbretëreshës, Princi Richard, Duka i Gloucester dhe Princi Eduard, Duka i Kentit, si dhe gratë e tyre, Birgitte dhe Katharine.
Çdo qershor, ka një paradë të quajtur Trooping the Colour, që shënon ditëlindjen zyrtare të Mbretëreshës, ndërsa këtë vit përkon me Jubileun Platinum që shënon 70-vjetorin e saj në fron.
Mbretëresha njoftoi paraprakisht se në ballkon do të shfaqeshin vetëm anëtarët e familjes me detyra mbretërore. Kjo nënkuptonte se nuk ishin Harry dhe Meghan, të cilët u larguan nga detyrat mbretërore në janar të vitit 2020. Gjithashtu mungonte Princi Andrew, të cilit iu hoqën detyrat në nëntor të 2019-ës për shkak të lidhjeve të tij me Jeffrey Epstein.
