Mbeti jashtë Euro 2024, Cikalleshi i jep fund karrierës me Kombëtaren e Shqipërisë
Sulmuesi shqiptar, Sokol Cikalleshi ka njoftuar për largimin e tij përfundimtar nga Kombëtarja e Shqipërisë.
Vendimi i futbollistit të spikatur të Shqipërisë, që ka lënë gjurmë të pashlyeshme ndër vite në repartin ofansiv të Kombëtares, erdhi pak kohë pasi që trajneri Sylvinho publikoi listën e lojtarëve të grumbulluar, të cilët do të jenë bartës të barrës së përfaqësimit të Shqipërisë në Euro 2024, pjesë e së cilës listë nuk ishte edhe Cikaleshi.
Lajmin për tërheqjen nga futbolli me kombëtaren e konfirmoi vetë Cikalleshi në rrjetet e tij sociale.
“Fundi i një rrugëtimi! Rrugëtimet janë të bukura, me uljet e ngritjet e veta. Gjatë rrugëtimeve nëse gjërat i ke bërë siç duhet, fundi është i lumtur, paçka se, jo gjithmonë e zgjedhim vetë mënyrën. Ka qenë një krenari dhe emocion i papërshkueshëm përfaqësimi i fanellës së ekipit kombëtar te futbollit.
“Bartja e emocioneve te një kombi mbi shpinë, është sa privilegj, aq edhe një përgjegjësi, e cila më ka bërë të përunjur dhe mirënjohës ndaj çdokujt dhe besoj, ndaj çdokujt që më dha kurajo për të vazhduar, e padyshim, në mënyrë të veçantë ndaj çdokujt që brohoriti për mua. Ashtu siç, çdo fillim e ka një fund, edhe rrugëtimit tim me ekipin kombëtar të futbollit i erdhi fundi! Ndihem i lumtur për çka bëra gjatë këtij rrugëtimi, ku dhashë pakursimin më të vogël pikën e fundit të djersës dhe shpirtin për të bërë më të mirën e mundshme”.
“Falënderoj Zotin për gjithçka më ka dhënë në jetë, familjen për mbështetjen, tifozët Kuq e Zi që meritojnë shumë më shumë sesa ne kemi dhënë në fushën e blertë. Lutem Zotit që shokët që do vijojnë rrugëtimin në Euro2024 të kenë sukses dhe të bëjnë një paraqitje dinjitoze”, ishte reagimi i Cikalleshit.
