Mashtrimi me subvencionet e MKRS-së, arrestohen pesë persona
Policia e Kosovës ka njoftuar se ka arrestuar tre zyrtarë të Federatës së Karatesë në Kosovë, të dyshuar për keqpërdorim të mjeteve financiare të Ministrisë së Kulturës, Rinisë dhe Sportit.
Hetuesit nga Sektori për Hetime Financiare, pas pranimit të një informacioni kanë nisur një hetim dhe kanë ngritur dyshime të forta se zyrtarët e Federatës së Karatesë kanë keqpërdorur fonde publike.
Dyshohet se gjatë periudhës 2019-2023, tre të dyshuar kanë shkaktuar një dëm të madh buxhetit të MKRS-se, në vlerë prej 87 mijë e 463 euro.
Të dyshuarit, të identifikuar si N. G. (viti i lindjes 1974), F. M. (viti i lindjes 1982) dhe I. K. (viti i lindjes 1968), janë arrestuar dhe intervistuar nga autoritetet.
Policia bën me dije se pas intervistimit, ndaj dy të dyshuarve N. G. dhe F. M. është caktuar masa e ndalimit për 48 orë, ndërsa I. K. është liruar në procedurë të rregullt.
Derisa në rastin e dytë, hetuesit policorë nga Njësia për Hetimin e Krimeve Ekonomike dhe Korrupsionit në Prishtinë, pas sigurimit të informatave dhe provave, nën dyshimin se të dyshuarit A. M., (viti i lindjes 1989, mashkull kosovar), në cilësi të kryetarit të Komisionit për Ndarjen e Grandeve, në komunën e Obiliqit, ka ndarë subvencion në vlerë prej 9,900.00€ për një klub basketbolli i cili dyshohet se ka qene jo aktiv.
Sipas njoftimit, i dyshuari ka qenë themelues i atij klubi. Kurse e dyshuara A.A., (viti i lindjes 1977, femër kosovare), si monitoruese e implementimit të subvencioneve, ka përpiluar raport të rrejshëm.
“Mbi bazën e gjetjeve është krijuar dyshimi se të dyshuarit kanë kryer veprat penale:‘Keqpërdorim i pozitës apo autoritetit zyrtar’ dhe ‘Konflikti i interesit’ Të dyshuarit e lartcekur janë intervistuar në prezencën e avokatëve mbrojtës dhe me aktvendim nga prokurori, i dyshuari A. M., është dërguar në mbajtje prej 48 orëve, ndërsa e dyshuara A.A., është liruar ne procedurë të rregullt”, thuhet në njoftim.
