MAPL-ja i shpall të pavlefshme vendimet e pozitës për ndërmarrjet publike në Prishtinë
Ministria e Administrimit të Pushtetit Lokal (MAPL), i ka shpallur të pavlefshme vendimet që Lidhja Demokratike e Kosovës dhe Partia Demokratike i kanë ndërmarrë në mbledhjen e fundit të Kuvendit Komunal të Prishtinës.
Dy partitë në pushtet në këtë mbledhje kanë siguruar votat e mjaftueshme për ta shkarkuar Kryesuesin e Kuvendit Komunal, Fehmi Kupinën si dhe për të rikthyer anëtarët e vet në bordet e ndërmarrjeve publike.
Sipas konstatimit të MAPL-së, në një vlerësim të ligjshmërisë, mbledhja e V-të e kryeqytetit “ka përfunduar në atë moment kur Kryesuesi i Kuvendit e ka shpallur të mbyllur mbledhjen për shkak të rrethanave të krijuara në pamundësi për të vazhduar, andaj vazhdimi i mbledhjes dhe vendimet e miratuara në atë mbledhje nuk krijojnë asnjë efekt juridik”.
Vendimin e ministrisë e ka publikuar të mërkurën në llogarinë e tij në Facebook, asamblisti i Lëvizjes Vetëvendosje, Gëzim Sveçla, i cili ka thënë se është momenti i fundit që të publikohen vendimet e seancës së jashtëzakonshme të datës 8 qershor, të miratuara nga opozita.
“Anulohet seanca klandestine e partive në pushtet në Prishtinë. Aksionarët e ndërmarrjeve publike komunale mbetën ata që kanë qenë, të opozitës; Kryesuesi mbetët ai që ka qenë nga fillimi i mandatit; Të gjitha vendimet tjera që janë marrë në atë “seancë” janë të pavlefshme. Është momenti i fundit të publikohen vendimet e seancës së jashtëzakonshme të datës 8 qershor. Mjaft e shkelët ligjin”, ka shkruar ai.
