Lutfi Haziri pret në takim ambasadorin e Finlandes Matti Nissinen
Nënkryetari i parë i LDK-së, Lutfi Haziri me bashkëpunëtorë ka pritur në takim ambasadorin e Finlandës, Matti Nissinen i cili ishte i shoqëruar nga delegacioni i Ministrisë së Punëve të Jashtme të Finlandës dhe Fondacioni për Paqe “Marti Ahtisari” – CMI.
Në takim u diskutua për procesin e dialogut në mes të Kosoves dhe Serbisë dhe ndërlidhjen me procesin e integrimit evropian.
Nënkryetari Haziri ka ritheksuar qëndrimin e LDK-së mbi procesin e dialogut për mbështetjen e këtij procesi me ndërmjetësimin e BE-së dhe me përfshierjen e drejtpërdrejtë të SHBA-së. LDK po ashtu mbështet implementimin e të gjitha marrëveshjeve që janë arritur në këtë proces.
LDK përsërit që Kosovës i duhet një marrëveshje përfundimtare e përqëndruar te njohja e ndërsjellë dhe asnjë marrëveshje tjetër nuk garanton normalizim të marrëdhënieve Kosovë-Serbi, thuhet në njoftimin zyrtar të LDK-së.
