Lumir Abdixhiku: 1.5 MILIARD PËR KRYEQYTET!
Sot, së bashku me Kryetarin e Prishtinës, Përparim Rama, në prani të mediave e shumë qytetarëve të mbledhur në Konferencën Prezantuese tonë të përbashkët, shpalosëm në detaje planet tona për Prishtinën në mandatin 4 vjeçar!
Mes qytetarëve që këtë konferencë e shndërruan në thuajse në një tubim, mes profesionistëve të fushës që kishin interes të veçantë për atë se çfarë i pret pas 9 shkurtit, shpalosëm planet tona për infrastrukturë, sport, kulturë, shëndetësi, energjetikë e arsim!
Si qeveri mbështetëse për Prishtinën, u zotuam po ashtu, në marrëveshje zotuese para gjithë pjesëmarrësve aty e para gjithë banorëve të Kryeqytetit se:
1. Do t’i ndajmë plot 200 milionë euro, në katër vite, për mësimin gjithëditor në të gjithë Komunën e Prishtinës. Edhe 28 mijë fëmijë të tjerë, të klasave 1 deri në 5 do të përfitojnë nga kjo reformë. Shujta të ngrohta, klasë e shkolla moderne, digjitalizim e qëndrim 8 orë në Prishtinë!
2. Plot 120 milionë euro do të ndahen për Qendrën Kombëtare të Sportit në Bërnicë, në 60 hektarët tashmë të projektuar nga Komuna e Prishtinës. Në këtë Qendër do të vendoset Stadiumi Kombëtar me 25-30 mijë ulëse, Pallati i Sporteve me Dorë, Pisha Olimpike, Gaming Hall, Fusha e Tenisit, Fakulteti i Edukatës Fizike si dhe kompleksi i qëndrimit!
3. Ngjitur me Qendrën Sportive, në 60 hektarë të tjerë, sipas planifikimit komunal, do të ndërtohet parku teknologjik, me Qendrën Kombëtare të Intelegjencës Artificiale të vendosur aty. Plot 45 milionë euro do të ndahen për vendin ku e ardhmja bëhet.
4. Unaza e Jashtme e Kryeqytetit, në 29 kilometra gjatësi, do të mbështeter nga Qeveria Qendrore. Fillimisht duke ndarë garancionin për marrëveshjen tashmë të arritur mes Komunës dhe Bankës Evropiane për Rindërtim e Zhvillim – kredi e butë prej 206 milionë eurove – e më pas dhe duke siguruar në plotni të 154 milionë eurot e vlerësuara për shpronësimin e trasesë!
5. Mbi 100 milionë euro do të ndahen për Kulturë. Në bashkëpunim me Kryeqytetin, do të identifikohen lokacionet e duhura për ndërtimin e Teatrit të Ri Kombëtar, Teatrit të Operas dhe Baletit, Muzeut të Artit Bashkëkohorë, e Muzeut të Paqes e Rezistencës. 100 milionë euro vetëm për kulturë!
6. Plot 120 milionë euro, tashmë të siguruara për projektin e kogjenerimit dhe dyfishimin e kapaciteteve aktuale të ngrohjes në Prishtinë, nëpërmjet Termokos. Ngrohje e lirë, më pak konsum energjetik, më shumë pastërti!
Dhe,
7. Spitali i ri i Kosovës, në një lokacion të ri, në Prishtinë. Plot 500 milionë euro për Spitalin e Ri, me 150 mijë metra katrorë të reja, 38 klinika të integruara në të – e pajisje të reja. Lokacioni i ri do të përcaktohet sipas nevojave të shtetit. Do të mbështesim po ashtu dhe ndërtimin e Spitalit të Kryeqytetit, një projekt i ndarë ky!
Pra, këto janë zotimet tona!
500 milionë euro për shendetësi!
200 milionë euro për mësim tërëditor!
120 milionë euro për sport!
360 milionë euro për Unazë!
120 milionë euro për ngrohje!
100 milionë euro për kulturë!
45 milionë euro për teknologji!
Plot 1.5 miliard euro për Prishtinë! 
