Legjenda e Portos, Jorge Costa vdes nga sulmi në zemër
Një nga figurat më ikonike në historinë e Portos dhe ekipit kombëtar portugez – Jorge Costa, vdiq në moshën 53 vjeç pas komplikikimeve të rënda në zemër.
Costa nuk ndihej mirë në qendrën stërvitore Olivai. Fillimisht ai u trajtua nga ekipi mjekësor i Portos, përfshirë Dr. Nelson Puga, i cili përdori një defibrilator. Zjarrfikësit dhe shërbimet e urgjencës mjekësore mbërritën në vendngjarje.
Pak më parë, rreth orës 12:30 të pasdites, Costa dha një intervistë për SportTV. Për shkak të vapës së madhe, ai kërkoi të fliste brenda qendrës stërvitore, por pak më vonë humbi ndjenjat.
Ai u dërgua në Spitalin São João në Porto në gjendje kritike dhe u shtrua menjëherë në kujdes intensiv, ku ndërroi jetë në orët e para të pasdites.
Në vitin 2022, drejtori i Portos pësoi një atak në zemër, por u shërua pas kateterizimit.
Jorge Costa, i njohur me nofkën “Bisha” në futboll, e filloi karrierën e tij te FC Foz në moshën 14-vjeçare, dhe një vit më vonë u transferua te Porto.
Si profesionist, Costa luajti për Porton për 13 sezone (1992–2005), me një periudhë të shkurtër te Charlton në vitin 2002. Arritjet e tij janë mbresëlënëse:
– 1 Ligë Kampionësh
– 1 Kupë UEFA/Ligë Europa
– 1 Kupë Ndërkontinentale
– 1 Kampionat Botëror për të Rinj
– 8 tituj portugezë
– 5 Kupa Portugeze
– 5 Superkupa Portugeze.
