Kuvendi Komunal e Gjilanit ka mbajtur mbledhje solemne me rastin e 15-vjetorit të shpalljes së Pavarësisë

Gjilan, 17 shkurt 2023 – Kuvendi Komunal i Gjilanit, nën udhëheqjen e Arianit Sadikut, kryesues, ka mbajtur sot mbledhje solemnte me rastin e 15-vjetorit të shpalljes së Pavarësisë së Kosovës, ku përpos përfaqësuesve institucionalë, kanë marrë pjesë edhe përfaaqësues të shoqatave të dala nga lufta e UÇK-së. 

Kryesuesi i Kuvendit, Arianit Sadiku, ka thënë se në këtë festë duhet të përulemi për sakrificën e shumë gjeneratave. 

“Në këtë ditë të 17 shkurtit, ashtu si në çdo ditë tjetër, ne duhet të kujtojmë dhe të përulemi me nderim e mirënjohje të thellë para luftëtarëve, intelektualëve, veprimtarëve bijtë e bijave tona të cilët sakrifikuan shumë me dekada të tëra që sot ne të gëzojmë dhe të festojmë lirshëm. Nderi dhe lavdia u takojnë atyre që bënë themelin e lirisë. Qofshin të lartësuar të gjithë dëshmorët për liri”, ka thënë kryesuesi Sadiku. 

Kryetari i Komunës, Alban Hyseni, ka thënë se shumë gjenerata e breza dhanë krejt çka kishin për këtë ditë. 

“Shumë gjenerata e breza dhanë krejt çka kishin për këtë ditë. Duket vështirë e besueshme që kanë kaluar 15 vite nga shpallja e Pavarësisë, madje edhe disa prej nesh në moshë më të re kemi ende imazhe të para luftës, ku jeta ishte e vështirë e padrejtësia ishte përditshmëri. Ku të qenurit shqiptar sillte pasoja. Më pas, sot e përgjithmomë mbesin në kujtesën tonë pamjet e masakrave, dëbimit masiv e shkatërrimit që solli lufta e fundit”, tha kryetari Hyseni.

“Por, historia më e re e vendit tonë ka krijuar edhe një fundament tjetër, ka krijuar një kthesë të madhe që njëherit është edhe krenari e mburrje. UÇK janë tri shkronja që çdo shqiptar do të krenohet me to sa të rrojë kombi ynë. Ishte kjo kurorzimi i përpjekjeve ndër breza për të çliruar popullin e për të dëbuar agresionin, dhunën e shtypjen. Gjilani ka për çfarë të krenohet e me të gjithë shqiptaria – prindër, fëmijë, vëllezër e motra dhe familjarë që sot ne i nderojmë si dëshmorë. Këto vlera janë të përbashkëta të cilat na bashkojnë të gjithëve”, ka shtuar kreu i Gjilanit. 

Ish-komandanti i Zonës Operative të Karadakut, Ahmet Isufi, ka thënë se shumë gjenerata janë sakrifikuar, janë përpjekur, që Kosova të jetë e lirë, e pavarur, sovrane, të jetë shtet ku qytetarët e saj jetojnë të lirë. 

“Prej shpalljes së pavarësisë së Shqipërisë më 1912 nuk janë ndalur përpjekjet e shqiptarëve që të kenë lirinë e tyre”, është shprehur Isufi.