Kurti thotë se u sabotuan në këto 4 vjet, i kërkon 500 mijë vota
Kryeministri i Kosovës, Albin Kurti, ka deklaruar se ata që në këto 4 vite sipas tij i kanë sabotuar nuk do të ecin përpara.
Kurti është shprehur kështu gjatë tubimit të LVV-së në sallën 1 tetori në Prishtinë, në prezantimin e kandidatëve për deputetë.
Ai ka thënë se Lëvizja Vetëvendosje është dhe do të vazhdojë përpara.
“Ndërkaq ata që na kanë sabotuar në këto 4 vite, duke përdorur secilin instrument që ende e kanë disi në duar edhe ndonjë ditë për të na goditur e dështuar tash po e shpalosin pezmin, inatin, xhelozinë, po besoni që me këto nuk ecën përpara. Ata janë prapa, ne jemi përpara dhe vazhdojmë bashkë përpara”, tha ai.
Kurti ka shtuar se ata e kanë parë se janë gabim pavarësisht përpjekjeve të tyre për sabotim dhe shantazhim edhe përmes Prokurorisë Speciale.
“E keni parë, keni dëgjuar qysh secilën iniciativë tonë e qoni në Kushtetuese për të na sabotuar edhe përmes Prokurorisë Speciale për të na urtësuar e shantazhuar, mirëpo e kanë gabim, dhe besoj që e kanë parë që e kanë gabim sepse ne jemi edhe të pakorruptueshem dhe të pashantazhueshëm, në çdo kohë edhe në çdo situatë”, shtoi Kurti.
Gjithashtu ai ka kërkuar nga qytetarët e Kosovës 500 mijë vota për siç ka thënë ai ‘të mos u varur nga lista serbe dhe as nga nga klubi i stëvjetruar politik’
“500 mijë vota nuk është thjesht aspiratë sa për kuriozitet, por është më e nevojshme se kurrë që jo vetëm të vazhdojnë punët e mira, të drejta e të domosdoshme që kemi nisur për republikën tonë, por që edhe të mos varemi nga Lista Serbe e as nga klubi i stëvjetruar politik”, deklaroi ai.
