Kurti për vdekjen e Shemit: Humbëm një zë që u bë pjesë e identitetit tonë
Kryeministri në detyrë i Kosovës, Albin Kurti, ka reaguar pas vdekjes së këngëtarit të njohur Shemsi Krasniqi – Shemi, duke e cilësuar atë si një nga zërat më përfaqësues të muzikës shqiptare.
Në reagimin e tij, Kurti ka thënë se Shemi, si vokalist i grupit legjendar “Ilirët”, i dha fytyrë një etape të rëndësishme të muzikës sonë dhe se zëri i tij hyri në shtëpitë e shqiptarëve pa trokitur, duke krijuar ndjenjë bashkimi edhe në kohë ndarjesh e largësish.
Sipas Kurtit, me interpretimin e Shemsi Krasniqit, kënga u shndërrua në kujtesë kolektive, ndërsa këngë si “Xhamadani vija-vija” u bënë shenjë identiteti dhe bashkimi për shqiptarët kudo që jetojnë.
“Këto janë zëra që rrallë lindin – jo vetëm artistë, por gjuhë e përbashkët e emocionit shpirtëror”, ka theksuar Kurti, duke shtuar se humbja e një artisti të tillë është një pikëllim mbarëkombëtar.
Kryeministri në detyrë ka shprehur ngushëllimet më të sinqerta për familjen Krasniqi, miqtë, bashkëpunëtorët dhe gjithë publikun që e deshi, duke theksuar se Shemi do të vazhdojë të jetojë përmes këngëve të tij.
“Disa zëra nuk mbarojnë me një lajm. Ata vazhdojnë sa herë që një këngë ngrihet si flamur në zemër”, ka përfunduar Kurti.
