Kurti dhe zëvendësministrja në Gjilan: Stadiumi i qytetit do të përfundojë në vitin 2027
Kryeministri i Republikës së Kosovës, Albin Kurti, së bashku me zëvendësministren e Kulturës, Rinisë dhe Sportit, Daulina Osmani, vizituan stadiumin e qytetit të Gjilanit, ku po zhvillohen punimet për ndërtimin e infrastrukturës sportive.
Gjatë kësaj vizite, Kurti e cilësoi si lajm të mirë për qytetin dhe për klubet sportive SC “Gjilani” dhe FC “Drita”, nisjen e punimeve në këtë projekt të rëndësishëm për Anamoravën.
Ai tha se stadiumi do të ketë kapacitet prej 8,750 ulësesh dhe do të përfundojë në fund të muajit maj të vitit 2027. Kostoja e përgjithshme e projektit kap shumën prej 12 milionë e 740 mijë euro.
“Pas dy viteve, në maj të vitit 2027, do ta kemi një stadium modern, të realizuar tërësisht”, u shpreh Kurti.
Nga ana tjetër, kryetari i Komunës së Gjilanit, Alban Hyseni, tha se ky projekt i shërben drejtpërdrejt komunitetit sportiv dhe se pengesat e mëhershme tashmë janë tejkaluar.
“Barrierat janë tejkaluar. Askush nuk mund ta ndalë më këtë projekt jetik për qytetin dhe sportin”, theksoi Hyseni.
Ndërsa zëvendësministrja Osmani theksoi se ky investim është pjesë e planit pesëvjeçar të Qeverisë për zhvillimin e infrastrukturës në të gjithë Kosovën.
Ajo sqaroi se punimet do të realizohen brenda afatit dyvjeçar, nga operatori ekonomik që ka fituar tenderin.
“Të gjitha mundësitë për ndryshime brenda projektit do të diskutohen pas përfundimit të kësaj kontrate,” deklaroi Osmani.
Në përfundim, Osmani kërkoj që përgjatë këtyre dy viteve së bashku me Ministrinë e Kulturës, Komunën e Gjilanit dhe të gjitha institucionet publike të jenë pjesë e procesit të monitorimit të cdo hapi të punës në mënyrë që të sigurohemi që kjo kontratë të përfundoj brenda dy viteve ashtu sic është paraparë. /Telegrafi/
