Kualifikueset e Botërorit 2026/ Shiten të gjitha biletat e ndeshjes Shqipëri-Angli
Federata Shqiptare e Futbollit ka njoftuar zyrtarisht se të gjitha biletat për ndeshjen Shqipëri – Angli janë shitur plotësisht. Përballja, e vlefshme për kualifikueset e Kampionatit Botëror 2026, do të zhvillohet më 16 nëntor në stadiumin “Air Albania” në Tiranë.
Procesi i shpërndarjes së biletave u zhvillua përmes aplikimit për rezervim, i hapur më 15 tetor. Tifozët shqiptarë kishin mundësinë të aplikonin gjatë disa ditëve, ndërsa përzgjedhja e fituesve u bë në mënyrë elektronike dhe të rastësishme, për të siguruar transparencë dhe barazi në proces.
Në deklaratën zyrtare, FSHF falënderon me mirënjohje të gjithë tifozët shqiptarë që kanë zgjedhur të jenë pranë Kombëtares në këtë ndeshje të madhe, duke i ftuar ata të krijojnë një atmosferë sa më të zjarrtë dhe pozitive në mbështetje të kuqezinjve.
“Falënderojmë të gjithë tifozët që do të jenë në ‘Air Albania’ për të mbështetur skuadrën tonë kombëtare. Ju ftojmë të krijoni një atmosferë të ngrohtë, sportive dhe frymëzuese për lojtarët tanë”, thuhet në njoftimin e FSHF-së.
Federata, ndërkohë, ka bërë apel edhe për ata që nuk arritën të sigurojnë bileta, duke i inkurajuar të vazhdojnë ta përkrahin me pasion dhe krenari Kombëtaren shqiptare, si brenda ashtu edhe jashtë stadiumit.
