Krasniqi: Si mund të akuzohem për persekutimin e anëtarëve të LDK-së, kur vetë isha anëtar i kësaj partie
“Është absurde të akuzohem për persekutimin e anëtarëve të LDK-së, kur vetë isha anëtar i saj. Vetëm një mendje e çoroditur do të mund të mendonte se jam pjesë e persekutimit të familjarëve të mi”, ka deklaruar ish-zëdhënësi i UÇK-së, Jakup Krasniqi, në fjalimin e tij para Gjykatës Speciale në Hagë.
Zona Ekonomike – Takim Publik
Në fjalën e tij para trupit gjykues, ish-kryeparlamentari i Kosovës, Jakup Krasniqi, ka thënë se është absurde se si mund të akuzohet nga Gjykata Speciale për persekutim të anëtarëve të Lidhjes Demokratike të Kosovës (LDK), kur edhe vetë ai dhe familja e tij ishin anëtarë të kësaj partie.
“Është absurde të akuzohem për persekutimin e të anëtarëve të LDK-së, kur vetë isha anëtar i saj. Familjarët e mi ishin anëtarë të LDK-së, vetëm një mendje e çoroditur mund ta mendojë këtë. Si shumë familjarë tjerë, vëllau im Agim Krasniqi ka qenë pjesë e LDK-së, vajza e tij e mbesa ime, Mimoza Krasniqi u zgjodh në asamblenë e Drenasit”, ka thënë Krasniqi.
Gjatë fjalës së tij, Krasniqi ka thënë se gjatë kohës sa ka qenë zëdhënës i UÇK-së, është përpjekur që përmes deklarimeve të mbajë shpresën te populli për të vazhduar rezistencën.
“Në rolin tim si zëdhënës i UÇK-së jam përpjekur të jap përshtypje se jemi një strukturë e organizuar mirë për të mbajtur shpresë te populli”, ka vijuar ai.
Ndryshe, gjykimi i ish-krerëve të UÇK-së, Hashim Thaçit, Kadri Veselit, Jakup Krasniqit e Rexhep Selimit, ka filluar më tre prill.
Krasniqi së bashku me ish-luftëtarët janë deklaruar të pafajshëm para Speciales dhe kanë mohuar akuzat që janë rënduar mbi ta.
Sot është dita e tretë e gjyqit ndaj ish-krerëve të UÇK-së në Gjykatën Speciale në Hagë të Holandës. Ata akuzohen për krime lufte dhe krime kundër njerëzimit.
