Kosova pjesëmarrëse në “Expo Osaka 2025”
Zv. Ministrja në detyrë e Ministrisë së Punëve të Jashtme e Diasporës, Liza Gashi ka njoftuar se Republika e Kosovës po përfaqësohet me krenari në “Expo Osaka 2025”, Kansai, Japoni.
Ajo nënvizoi se ky prezantim vjen si rrjedhojë e një bashkëpunimi të ngushtë ndërinstitucional.
“Si udhëheqëse e Komisionit Ndërshtetëror për këtë projekt të menaxhuar nga Qeveria, ndjehem shumë e lumtur që për herë të dytë jemi pjesë e kësaj ngjarje botërore, e cila ofron një mundësi të jashtëzakonshme për të prezantuar kulturën, trashëgiminë si dhe potencialin ekonomik e zhvillimor që ofron vendi ynë”, shkroi ajo në faqen e saj.
Sipas saj, Pavijoni i Kosovës në Osaka është konceptuar si një hapësirë mikpritëse, ku vizitorët nga Japonia dhe nga mbarë bota do të kenë mundësi të njohin nga afër Kosovën.
“Gjatë muajve në vijim, pavijoni ynë do të ofrojë mundësi të shumta për promovimin e potencialit tonë dhe ndërtimin e një imazhi të denjë të vendit në atë pjesë të botës”, shtoi ajo.
Zv. Ministrja Gashi vuri në dukje poashtu përgatitjet institucionale për paraqitje sa më dinjitoze në këtë ngjarje kulturore, me pjesëmarrjen më reprezentative institucionale në këtë vend mik të Lindjes së Largët.
“Veçanërisht gëzohemi që në Ditën Kombëtare të Kosovës në Expo, më 11 qershor, do të marrin pjesë Presidentja e Republikës, znj. Vjosa Osmani-Sadriu, si dhe Filharmonia dhe Baleti i Kosovës, me një program dinjitoz artistik dhe kulturor”, shtoi ajo.
Në fund Zv. Ministrja e MPJD-së ka falënderuar ekipin ndërinstitucional të Expo-s dhe komisionerin Arbër Mehmeti, si dhe për Ambasadën e Republikës së Kosovës në Japoni, të udhëhequr nga Shefi i Misionit, ambasadori z. Sabri Kiçmari.
