Komuna e Gjilanit “Ngelë”, nuk e kalon provimin!
Në njoftimin e tij përmes rrjeteve sociale, drejtori i Drejtorisë Komunale për Buxhet dhe Financa, Riad Rashiti, ka bërë të ditur se Komuna e Gjilanit nuk është kualifikuar për grant të performancës për vitin 2021.
Sipas tij kjo vie si pasojë e raportit negativ të Auditorit Gjeneral të Kosovës, i cili ka thënë se është diskutuam bashkë me OSBE-në dhe zyrën e Auditorit Gjeneral të Kosovës, ka shkruar Rashiti.
“Opinioni i kualifikuar i raportit të auditimit për vitin 2021, e ka përjashtuar komunën e Gjilanit nga mundësia për të aplikuar në grantin e performancës për komunat e Kosovës, ku janë ndarë rreth 8 milion euro për 6 komunat tjera që i kanë plotësuar kushtet dhe kriteret për aplikim, e që do të jenë përfituese në vitin e ardhshëm”, tha ai.
Rashiti më tej ka nënvizuar se qeverisje komunale, tani ka marrë masa sipas planit të veprimit për 14-të të gjeturat negative në raportin e auditimit për vitin 2021, si dhe rekomandimet e dalura nga ai raport.
“Sipas vlerësimit të institucioneve tona komunale, deri tani kemi zbatuar plotësisht 7 nga 14 të gjeturat e auditorit, pjesërisht janë zbatuar 4 rekomandime dhe 3 rekomandime tjera ende nuk janë zbatuar, por për të cilat së fundi kemi bërë angazhime dhe veprime për të zbatuar edhe këto rekomandime”, nënvizoi Rashiti.
“Ne jemi të përkushtuar që buxheti i komunës së Gjilanit të shpenzohet vetëm sipas ligjit të financave publike dhe udhëzimeve administrative. Nuk do të lejojmë e as përsërisim shkeljet e shumta ligjore e procedurale, në shpenzimin e parasë publike”, shtoi drejtori i Drejtorisë për Buxhet e Financa, duke u shprehur i bindur se një gjë e tillë është e vetmja rrugë që mund të krijojë stabilitet financiar në komunën e Gjilanit në vitet të vijim, për të pasur mundësi aplikimi për grant të performancës për vitin 2022 e tutje.
