Kamenicë: Nënshkruhet marrëveshje për avancimin e kodimit në shkollat e komunës
Drejtori i Arsimit, Selami Klaiqi, ka nënshkruar marrëveshje bashkëpunimi me SHPIK-un, e cila mundëson trajnimin e të gjithë mësuesve të klasave të para për përdorimin e platformës Code.org.
Kjo marrëveshje synon avancimin e aftësive teknologjike te nxënësit dhe integrimin e qasjeve inovative në procesin mësimor në shkollat e komunës.
Me këtë rast, drejtori Klaiqi ka bërë të ditur se duke filluar nga shtatori i vitit 2026, të gjithë nxënësit e komunës që nga klasa e parë do të kenë mundësinë që përmes kodimit të zhvillojnë shkathtësitë e tyre kreative, të menduarit kritik dhe aftësitë për zgjidhjen e problemeve.
“Ky bashkëpunim do të mundësojë implementimin e aktiviteteve të kodimit, si dhe zhvillimin e sfidës ndërkombëtare ‘Bebras Computing Challenge’, duke nxitur mendimin logjik, zgjidhjen e problemeve dhe rritjen e interesit për shkencat kompjuterike tek nxënësit”, ka theksuar drejtori Klaiqi.
Kjo nismë përbën një hap të rëndësishëm drejt modernizimit të arsimit dhe përgatitjes së gjeneratave të reja për sfidat e epokës digjitale.
