Ja çfarë shkroi Bllazheviq në katërvjetorin e vdekjes së Vokrrit
Trajneri kroat i gjeneratës së artë të Prishtinës në futboll, Miroslav Qiro Bllazheviq, kishte bërë një shkrim në faqen e tij në Facebook, në katërvjetorin e vdekjes së legjendës së futbollit kosovar Fadil Vokrri. Ai e kishte vlerësuar privilegj mundësinë që ta stërviste një lojtar si Vokrri.
“Kanë kaluar 4 vjet nga vdekja e papritur e Fadil Vokrrit dhe ende me shumë mall e kujtoj popullaritetin e tij dhe dashurinë e përgjithshme që publiku ushqente ndaj tij në kohën kur unë e drejtoja Prishtinën. Aq i fortë, shpërthyes, i shkathët, me teknikë dhe goditje të shkëlqyer, ai shkundi lehtësisht të gjithë mbrojtësit që përpiqeshin ta ndalonin. Ai dinte çdo gjë, si të shënonte ashtu edhe të asistonte e të shënonte edhe me kokë. Në këmbë shpesh e kishte topin dhe dinte të gjuante nga 20 metra e ta mposhte portierin si për shaka. Por nuk ishte vetëm një futbollist i talentuar, por edhe një burrë i madh. Human që me karakterin e tij bënte për vete masën. Kur i do njerëzit – atëherë edhe ata të duan! Ai ishte shumë emocional, dhe kështu jam edhe unë tash që e kujtoj atë dhe një nga aventurat më të bukura të jetës sime. I gjithë qyteti jetoi për klubin për ta shpëtuar atë. Sot, historia e asaj epoke të paharruar përcillet brez pas brezi, dhe edhe sot ndiej kënaqësi të pamasë për periudhën që kalova me Fadil Vokrrin në Prishtinë”, ka shkruar Bllazheviq.
Ai ka thënë se ka një pendesë, që nuk arriti ta bindte Vokrrin t’i bashkohen Dinamos së Zagrebit.
“Ajo që më vjen sinqerisht keq është që nuk arrita ta bindi Vokrrin të vinte në Dinamo. Partizani dhe Dinamo i ofruan kontrata joshëse atij për dy vjet, por në fund ai pranoi ofertën e Partizanit, që ishte shumë më e mirë për të, sepse Dinamo nuk ishte aq e fuqishme në atë kohë sa të mund ta përballonte financiarisht. Për ta përmbyllur këtë kujtim në përvjetorin e sotëm: Fadil Vokrri ishte dhe do të mbetet një figurë historike e klimës sonë dhe jam i lumtur që e pata privilegjin që ta stërvisë”, ka shkruar Bllazheviq.
Vokrri vdiq katër vjet më parë si pasojë e sulmit në zemër. Gjatë karrierës si futbollist ai kishte luajtur për Prishtinën, Partizanin, Nimesin, Fenerbahçen, Bourges 18 dhe Montluçonin. Luajti edhe 12 ndeshje për përfaqësuesen e ish-Jugosllavisë e shënoi gjashtë gola.
Ai ishte kryetar i Federatës së Futbollit të Kosovës nga viti 2008 deri në vitin 2018, kur vdiq në moshën 57-vjeçare. Pas vdekjes së tij u shpallën zgjedhjet e jashtëzakonshme në Federatë dhe mandatin e presidentit e mori Agim Ademi.
