Instituti Albanologjik – Prishtinë, uron shqiptarët me rastin e 112 vjetorit të shpalljes së pavarësisë së Shqipërisë dhe Ditës së Flamurit
Instituti Albanologjik-Prishtinë ua uron të gjithë shqiptarëve kudo që ndodhen festën e 28 Nëntorit, Ditën e Flamurit, një ditë jashtëzakonisht të rëndësishme dhe tejet të vlefshme për kombin tonë.
Në këtë ditë të madhe për shqiptarët, kujtojmë dhe respektojmë të gjithë burrat dhe gratë, atdhetarët dhe heronjtë, të flijuarit dhe të përkushtuarit deri në vetëmohim, të cilët dhanë çdo gjë që Shqipëria jonë të jetë e mëvetësishme. Plaku i mençur e mjekërbardhë, Ismail Qemali, trimi fisnik dhe malësori i paepur, Isa Boletini, Marigoja e flamurit, Luigj Gurakuqi i mençur dhe i devotshëm, dhe shumë të dijshëm, trima, gra e burra të tjerë vetëmohues, janë shembuj të mirëfilltë atdhetarie dhe udhëzues për rrugën që duhet ta ndjekim për përparimin e shqiptarëve kudo në botë.
Në këtë ditë të madhe për shqiptarët, kujtojmë dhe nderojmë kryeheroin e luftës për çlirimin e Kosovës, Adem Jasharin, i cili ka lindur pikërisht më 28 nëntor. Një shenjë e ndërlidhjes eternale të datave të rëndësishme të një kombi. Për heronjtë si Adem Jashari më e rëndësishme është datëlindja se datëvdekja, sepse ata jetojnë përgjithnjë në kujtesën, nderimin dhe vlerësimin tonë.
Po ashtu, në këtë ditë kujtojmë daljen e parë publike të Ushtrisë Çlirimtare të Kosovës, që i dha shpresë shqiptarëve të Kosovës se ata dinë dhe mund të fitojnë lirinë. Dalja publike e UÇK-së në varrimin e mësuesit Halit Geci më 28 nëntor, 1997, i dha shpresë popullit shqiptar në Kosovë se liria mund të vijë dhe do të vijë nga lufta dhe guximi i djemve dhe vajzave të reja që kishin vendosur të flijohen për vendin dhe tokën e tyre.
