IHMK paralajmëron për rreziqet e temperaturave ekstremisht të larta në Kosovë
Instituti Hidrometeorologjik i Kosovës (IHMK) ka njoftuar se vendi po përballet me një valë të të nxehtit ekstrem, ku temperaturat maksimale pritet të arrijnë deri në 38 gradë Celsius.
Sipas njoftimit zyrtar, këto kushte të motit konsiderohen tejet të rrezikshme, veçanërisht nëse zgjasin për disa ditë me radhë.
Rreziku më i madh u kanoset personave me sëmundje kronike, atyre që janë nën terapi apo trajtim mjekësor, si dhe kafshëve.
Gjithashtu, IHMK paralajmëron për probleme të mundshme në furnizimin me ujë dhe energji elektrike, si dhe vështirësi në qarkullimin rrugor. Për më tepër, këto kushte janë jashtëzakonisht të favorshme për përhapjen e zjarreve në pyje dhe ambiente të tjera të hapura.
