Hapet panairi rajonal “Anamorava mirëpret Diasporën”
Është hapur panairi rajonal “Anamorava mirëpret Diasporën”, nga Drejtoria për Zhvillim Ekonomik e Komunës së Gjilanit, në bashkëpunim me Odën Ekonomike e Kosovës.
Nënkryetarja e Komunës së Gjilanit, Leonora Morina Bunjaku, ka folur në emër të kryetarit Alban Hyseni.
“Kam kënaqësinë që sot, të u uroj mirëseardhje në hapjen e panairit “Anamorava mirëpret diasporën”, një aktivitet që i kushtohet lidhjes së dashurisë, kujtesës dhe përgjegjësisë që kemi ndaj njëri-tjetrit – qoftë në vendlindje, qoftë në mërgatë”, tha Morina Bunjaku.
Nënkryetarja e Gjilanit, theksoi se ky panair është një mundësi e jashtëzakonshme për të promovuar prodhimet vendore, për të forcuar bashkëpunimin me bizneset tona jashtë vendit dhe për të dëshmuar se diaspora nuk është vetëm kontribut financiar – por një burim dijesh, përvoje dhe partneriteti afatgjatë.
Sipas saj Gjilani, gjithmonë e ka konsideruar diasporën si një pjesë të pandashme të zhvillimit dhe të ardhmes së vet. Prandaj, si komunë, në bashkëpunim me OEK-un, janë të përkushtuar që ky bashkëpunim të jetë i qëndrueshëm, konkret dhe frytdhënës.
Ajo falënderoj të gjithë organizatorët, ekspozuesit, dhe veçanërisht mërgatën tonë për praninë dhe përkushtimin ndaj vendlindjes.
“Ju dëshiroj shumë suksese në këtë panair dhe marrëveshje të dobishme për të gjithë. Faleminderit dhe mirë se keni ardhur në Gjilanin tuaj”, tha nënkryetarja Morina Bunjaku.
Kryetari i Odës Ekonomike të Kosovës, Lulëzim Rafuna, tha se rëndësia e panairit është e madhe, jo vetëm si vend ekspozimi, por si dëshmi e sakrificës dhe suksesit të grave në biznes.
“Pa fuqizimin e gruas nuk ka ekonomi të fortë. Është kënaqësi që të hapim këtë panair në Gjilan.
Është një mundësi shumë e mirë për të bashkëpunuar. Ky panair është më shumë se ekspozim i mallit. Është një panair, ku gjendet frymëzimi që sot përfaqëson një grua, tregon sakrificën që e ka pasur prej ditës që ka filluar biznesin deri në momentin kur kanë triumfuar”, tha Rafuna.
Kreu i OEK-ut shtoi se përveç që është një storie suksesi, kanë treguar se pa fuqizimin e gruas nuk do të ketë edhe ekonomi të fortë.
Për panairin ka folur edhe drejtoresha për Zhvillim Ekonomik dhe Diasporës, e Komunës së Kamenicës Burbuqe Leka.
Në panair ishte edhe drejtori për Zhvillim Ekonomik, i Komunës së së Gjilanit, Enver Shabani.
Panairi do të jetë i hapur dy ditë sot dhe nesër (e premte).
