Hamasi thotë se i ka dorëzuar të gjithë trupat e pengjeve që ka mundur t’i arrijë

Krahu ushtarak i Hamasit tha të mërkurën se “përpjekje domethënëse dhe pajisje speciale” nevojiten që të nxirren trupat e pengjeve të mbetura izraelite në Gaza.

Brigadat Al-Qassam thanë në një deklaratë se “e kanë respektuar atë për të cilën ka pasur marrëveshje dhe i kanë dorëzuar të gjitha pengjet e gjalla që i ka pasur dhe kufomat në të cilat ka mundur të ketë qasje”, raporton televizioni CNN.

Sipas marrëveshjes së armëpushimit, Hamasi duhej t’i kthente të gjitha pengjet e gjalla dhe të vdekura brenda 72 orëve të para nga hyrja në fuqi e paktit. Megjithatë, grupi ka dorëzuar vetëm shtatë prej 28 pengjeve të vdekura.

Përderisa Izraeli ka qenë i vetëdijshëm se jo të gjitha pengjet e vdekura do të ktheheshin deri në afatin e së hënës, një burim i tha televizionit CNN se udhëheqësit izraelitë janë të zemëruar me ritmin e ngadalshëm të dorëzimit të trupave dhe janë duke shqyrtuar disa opsione, nëse vonesat vazhdojnë.

Dy vjet luftë kanë shkaktuar shkatërrim të konsiderueshëm në mbarë Rripin e Gazës, duke e bërë potencialisht të vështirë kërkimin e trupave. Siç raportoi televizioni CNN javën e kaluar, Izraeli ka vlerësuar se Hamasi mund të mos jetë në gjendje që t’i gjejë dhe t’i kthejë të gjitha pengjet e vdekura në Gaza që nuk janë kthyer ende.

Megjithatë, zemërimi në Izrael është shtuar me faktin se sa pak prej pengjeve të vdekura janë kthyer nga Hamasi. Ministri i Mbrojtjes i Izraelit, Israel Katz, mungesën e progresit në këtë çështje e ka quajtur “dështim për t’i mbajtur zotimet”./Nacionale