Grabitje në shtëpinë e pronarit të ‘Vali Ranch’, hajnat ‘rrëmbejnë’ stoli në vlerë të rreth 22 mijë €
Shtëpia e pronarit të ‘Vali Ranch Resort SH.P.K.”, Fehmi Fetahi, u bë cak i hajnave të shtunën, madje ishte vetë Fetahi i cili e denoncoi rastin në Polici, mbrëmjen e së premtes.
Burimet brenda Prokurorisë kanë bërë me dije se Fetahi ka kërkuar ndihmën e Policisë, me ç’rast ka raportuar vjedhjen e disa stolive në shtëpinë e tij. Sipas informacioneve të para, hajnat ia kanë mësyrë shtëpisë së Fetahit, ku ‘avulluan’ unaza e orë dore, që kapin vlerën e rreth 22 mijë eurove.
Posa rasti u raportua, njësitë policore kanë kryer në vendin e ngjarjes të gjitha ekzaminimet që ndihmojnë në zbardhjen e rrethanave të rastit dhe çojnë në identifikimin e personave të dyshuar.
Ndërkohë, rasti është konfirmuar edhe nga Policia Rajonale në Gjilan dhe është bërë e ditur se rasti është cilësuar ‘Vjedhje e rëndë’, teksa kanë nisur hetimet.
