Gjilani lëshon fitoren nga duart, Ballkani merr një pikë në shtesë
Ballkani dhe Gjilani kanë barazuar 1-1 në ndeshjen e vlefshme për javën e 10-të në Albi Mall Superligën e Kosovës.
Gjilani ka lëshuar fitoren nga duart në minutat shtesë pasi ishte gati t’i merrte tri pikë të mëdha në udhëtim te Ballkani në derbin e javës.
Pjesa e parë e ndeshjes u karakterizua me lojë të barabartë dhe raste të pakta nga të dyja ekipet, kështu që 45 minutat e parë u mbyllen pa gola (0-0).
Në pjesën e dytë, pati më shumë raste nga të dyja skuadrat, por të parët që arritën të shënojnë ishin mysafirët.
Goli i parë i ndeshjes erdhi në minutën e 69-të me anë të Edi Basa, i cili sapo erdhi nga banka shënoi për epërsinë e gjilanasve 0-1.
Pas këtij goli u shpeshtuan raste nga të dyja ekipet, me mysafirët që patën disa raste për të dyfishuar, por pa sukses dhe krejt në fund erdhi goli i vendasve.
Në minutat shtesë, ishte mesfushori Giovanni, i cili shënoi me kokë për 1-1 dhe përkundër disa rasteve tjera në minutat shtesë, portat mbeten të paprekura dhe ekipet u desh të pajtohen me nga një pikë.
Pas këtij barazimi, Ballkani mbetet i dyti me 19 pikë, teksa Gjilani renditet i shtati me 11 pikë.
Në ndeshjen e ardhshme, therandasit udhëtojnë te Malisheva, teksa gjilanasit e presin Dukagjinin.
