Gjilan: Universiteti “Kadri Zeka” në Gjilan, fillon vitin e ri akademik me pesë programe të reja në nivelin Master
Prorektori për çështje të Studentëve, Prof. Dr. Xhevdet Thaçi, ka njoftuar se ky vit akademik e gjenë UKZ-në me risi të shumëta, veçmas në nivelin e Studimeve Master, madje në disa programe.
“Në Universitetin “Kadri Zeka”, përveç studimeve Bachelor, organizohen prej vitesh edhe ato të nivelit Master, madje nga viti 2018 e këtej, duke filluar me programin E-Qeverisje dhe Qeverisje Lokale. Ndërsa sivjet kemi paraqitur konkursin për pesë programe – Master, të cilat janë: Mësimdhënia në Gjuhë dhe Letërsi Shqipe, Mësimdhënia dhe kurrikula, Juridiko Penal, E-Qeverisje dhe Sistemet e Kontrollit dhe Inteligjenca Artificiale. Numri i gjithëmbarshëm i studentëve që kanë aplikuar për t’u regjistruar në këto pesë programe është 185, ndërsa interesimi ka qenë i kënaqshëm. Kjo pasi janë pranuar gjithësej 190 kandidatë. Në disa prej programeve kemi pasur interesim më të madh, ku për një vend janë paraqitur 3 kandidatë, ndërsa në drejtimin Juridiko-Penal interesimi ka qenë relativ ngase për 25 vende janë paraqitur gjithsej 33 kandidatë. Ndërsa në e-Qeverisje dhe Sisteme të Kontrollit, kemi pasur interesim pak më të vogël, por edhe këtu nuk ka munguar”.
Prof. Thaçi vuri në pah edhe interesimin në rënie e sipër të studentëve nga Lugina e Preshevës, të cilët në të kaluarën kanë studiuar në numër relativisht të madh në Gjilan e Prishtinë, porse viteve të fundit, ata nuk shfaqin interesim, për arsye tashmë të ditura botërisht, shkaku i mosnjohjes së diplomave të arrira në studime në universitete e kolegje në Republikën e Kosovës.
“Për studentët e Luginës së Preshevës edhe më tej janë kuotat e garantuara, mirëpo sikurse viteve të më parshme edhe këtë vit numri i tyre është më i vogël. Kemi arritur të konstatojmë se arsyeja e interesimit të vogël të tyre për të studiuar në Gjilan lidhet pikërisht me faktin se akoma nuk pranohen diplomat nga Republika e Kosovës”.
UKZ, në një mënyrë apo tjetër është bërë një adresë interesimi e studimi edhe për studentë nga vise e regjione tjera të Republikës së Kosovës e më gjërë, pasi edhe këtë vit sikurse viteve të mëparshme ka pasur interesimi relativ, ka thënë prof. Thaçi.
“Në programin e-Qeverisje vazhdojmë të kemi studentë nga të gjitha viset e Kosovës, por edhe në Mësimdhënie Gjuhë dhe Letërsi ka pasur interesim. Pra, në përgjithësi, në të gjitha programet kemi një përfshirje jashtë regjionit të Gjilanit. Universiteti është i hapur për të gjithë, si për studentë nga jashtë territorit të Komunës së Gjilanit ashtu edhe për studentë që vijnë nga jashtë territorit i Repuublikës së Koosvës”, ka përfunduar Prof. Dr. Xhevdet Thaçi, në bisedën e zhvilluar enkas për TV Gjilani, në vigjilie të vitit të ri akademik 2023/2024.
