Gjilan: – Shkolla “Mehmet Isai” përgatit nxënësit për tregun e punës me programe ideale sipas kërkesave speciale
Shkolla e Mesme Teknike “Mehmet Isai” në Gjilan po zhvillon aktivitete në dy fronte: në njërën anë kolegiumi i kësaj shkolle së bashku me menaxhmentin e nxënësit, është duke përmbyllur vitin shkollor 2022/2023, ndërsa paralelisht është duke zhvilluar aktivitete përgatitore për vitin e ri 2023/2024, duke filluar nga konkursi për nxënësit e rinj, deri te provimi pranues dhe çështjet tjera që ndërlidhen me këtë proces.
Ndërkohë, së fundi i është dhënë prioritet nga instancat komunale e DKA, me mbështetje të vazhdueshme, duke shfrytëzuar tërë mekanizmat institucional, për të njoftuar e sensibilizuar nxënësit e prindërit si dhe gjithë qytetarëve në lidhje me programet që kjo shkollë tanimë ofron, e të cilat programe janë në përputhje të plotë me nevojat e tregut të punës.
Sipas drejtoreshës Lumnije Tahiri – Sadriu, Organizata LUX – DEB nga Luksemburgu ka ofruar mbështetje të jashtëzakonshme me pajisje për sistemet e IT-së.
“Kjo organizatë na ka mbështetur me pesë profile: sisteme të IT-së, sisteme të IT-së së biznesit; Instalues elektrik; Instalues të ngrohjes, ujësjellësit e klimatizimit, si dhe profili për metalpunues. Për këto profile janë kompletuar me pajisje kabinetet, planprogrami mësimor në bashkëpunim me MAShTI-n, si dhe literatura mësimore për nxënësit e përkthyer në gjuhën shqipe”, ka thënë ajo për TV Gjilani.
Në vazhdën e aktiviteteve drejtoria e kësaj shkollë së bashku me DKA-në kanë organizuar vazhdimisht takime prezantuese për nxënësit e prindërit e tyre, përmes një fushate informuese, ndërsa vet nxënësit e ciklit fillor kanë qenë disa herë në mënyra të organizuar në Qendrën e Karrierës IAAP “Mehmet Isai” – Gjilan, për të pa nga afër kushtet dhe mundësitë që kjo qendër ofrohen me programet e saj.
E interesimi për të pa nga afër mundësit që ofron ky institucion për orientim në karrierë krahas nevojave të tregut të punës, ka nxitë kurreshtjen e mëtejme të vet nxënësve, por edhe prindërve.
“Kemi vërejtur interesim më të madh të nxënësve për këtë vit shkollor. kemi vërejtur poashtu edhe interesim të prindërve, pasi pikërisht prindërit janë ata që ndihmojnë fëmijët për orientim në karrierë. Ne mendojmë që sipas interesimit që shohim, që në afatin e parë do të plotësohen vendet e parapara për pranim të nxënësve”.
“Për profilet që posedon shkolla teknike, aktualisht ka shumë nevojë tregu i punës. Ne këtë vit kemi pasur si një lloj asistenti GIZ-in Gjerman, dhe komplet nxënësit e klasëve të XII-ta praktikën profesionale e kanë kryer në biznese. Shumica e bizneseve me dëshirë i kanë paguajtur ata, ndonëse me një shumë simbolike. Prandaj vlerësojmë se tregu i punës ka nevojë të madhe, madje ka nevojë që ende të hapë profile teknike”, ka shtuar drejtoresha Lumnije Tahiri – Sadriu.
Në anën tjetër, përveç ofertës së jashtëzakonshme për nxënësit e pasionuar me këto drejtime profesionale, krahas nevojës së përhershme për tregun e punës, së fundi Ministria e Arsimit, Shkencës, Teknologjisë dhe Inovacionit ka shpallur vendimin për ndarjen e bursave në drejtimet deficitare për nxënësit dhe në drejtimet teknike për vajza në Institucionet e Arsimit Profesional.
Shkolla e Mesme Teknike “Mehmet Isai” në Gjilan, krahasuar me dekada të veprimtarisë së saj të mëparshme, tani tregohet si një storie suksesi, pasi ka një personel adekuat të kualifikikuar e të profilizuar, por edhe të dëshmuar, ndërsa transformimi i shkollës ndër vite e dekada ka qenë sfidë në vete, sipas drejtoreshës Lumnije Tahiri – Sadriu.
Ajo ka ritheksuar se në këtë vatër të arsimit janë bërë investime edhe në infrastrukturë, krahas ngritjes së vazhdueshme të cilësisë dhe ofrimit të personelit adekuat e të profilizuar, si dhe janë pajisur edhe kabinetet e informatikës e të tjerë me pajisje të nevojshme krahas nevojave të kohës. /Tv Gjilani News/
