Gjilan: – Interesim i madh i nxënësve për furnizim me tekste e mjete në prag të vitit të ri shkollor 2024/2025
Vetëm disa ditë para fillimit të vitit të ri shkollor 2024/2025, është vërejtur një fluks i madh i nxënësve dhe prindërve për furnizime me mjete mësimore, tekste e pajisje tjera didaktike, gjithandej vendit.
Një interesim i jashtëzakonshëm është vërejtur edhe në Komunën e Gjilanit, në të cilën gravitojnë mijëra nxnës në dhjetëra shkolla, si në vet qytetin e Gjilanit ashtu edhe në lokalitete e fshatra tjera të kësaj komune.
Nxënës të shumtë e prindër dhe famijlarë tjerë të afërm, gjatë gjithë javës janë interesuar për t’u furnizuar me pajisje të nevojshme për fëmijët e tyre, ndërsa gjatë ditës së premte numri i vizitorëve të librarive të qyteteve ka qenë jashtëzakonisht i madh.
Afërdita Mehmeti, pronare e librarisë “ABC” në Gjilan, tha se interesimi e njëherit furnizimi me pajisje shkollore ka filluar kohë më parë ndërsa gjatë ditëve të fundit, kjo librari është frekuentuar masivisht me nxënës, prindër, qytetarë e familjarë.
“Furnizimi i nxënësve me libra e pajisje tjera didaktike është jashtëzakonisht i madh. Ky proces ka filluar thuajse 10 ditë më parë, ndërsa gjatë ditëve të fundit numri i nxënësve dhe prindërve për t’u furnizuar me pajisje të nevojshme ka qenë jashtëzakonisht i madh”, tha fillimisht ajo për TV Gjilani.
Sipas saj, përvec nga Gjilani, ka edhe shumë nxënës e familjarë tjerë që vijnë enkas për t’u furnizuar nga qytete e lokalitet tjera.
“Që nga momenti që MASHTI ka subvencionuar nxënësit për tekste e pajisje tjera mësimore, fluksi i qytetarëve ka shënuar rritje të madhe, ndërsa është duke vazhduar gjatë gjithë kohës, deri në këto momente”, shtoi ajo.
E në mesin e shumë qytetarëve dhe prindërve dhe familjarëve të nxënësve që kishin ardhur në këtë librari për t’u pajisur me tekstet dhe mjete të nevojshme, ishte edhe Profesoresha e UKZ-së, znj. Afërdita Ibrahimi, nënë e tre nxënësve. Ajo u shpreh e kënaqur me gamën e gjërë të ofertës nga kjo librari.
“Jam e kënaqur me ofertën. Cdo vit furnizohem me libra e pajisje tjera në këtë periudhë, para fillimit të vitit të ri shkollor. Jam nënë e tre fëmijëve për të cilët zakonisht furnizohem në librarinë “ABC”, si me libra ashtu edhe me mjete tjera të nevojshme shkollore për fëmijët”, shtoi ajo, duke u shprehur e kënaqur me kujdesin e menaxhmentit për sasinë e teksteve dhe mundësitë e shumëta që ka ofruar për nevojat e nxënësve.
Kujtojmë që viti i ri shkollor 2024/2025, fillon të hënën më 2 shtator, ndërsa kohë më parë, saktësisht më 14 gusht, është hapur aplikimi për subvencionimin e teksteve mësimore nga MASHTI.
Sic është njoftuar paraprakisht, secili nxënës filloristë nga klasa e parë deri në klasën e pestë, në total është subvencionuar me nga 80 euro, ndërsa për nxënësit e arsimit të nivelin të mesëm të ultë, gjegjësisht nga klasa e gjashtë deri në klasën e nëntë, janë dedikuar e njëherit janë ndarë nga 110 euro, pasi të njejtit paraprakisht kanë aplikuar në platformës E-Kosova për subvencionim, sipas njoftimit nga MASHTI.
