Gagica flet për rritje të AAK-së në komunat e Anamoravës
Në qytezën e Kamenicë, gjegjësisht në këtë qytet, janë takuar strukturat e tri degëve të AAK-së nga Rajoni i Anamoravës – Gjilan, Kamenicë, Viti.
Kështu ka njoftuar i pari i degës së këtij subjekti në Gjilan, Nazim Gagica, i cili ka theksuar se takimi është zhvilluar në funskion të thellimit të bashkëpunimit mes degëve të AAK-së nga Anamorava.
“U takuam sot në Kamenicë, në kuadër të takimeve të rregullta të Këshillave Politik në kuadër të tri degëve të AAK-së në Anamoravë. Faleminderit kryetarit Faton Jakupi për organizimin e këtij takimi, si dhe kryetarin e degës në Viti Labinot Bislimi për bashkëpunimin dhe idetë e shumta”, ka thënë Gagica.
Kreu i AAK-së në Gjilan Nazim Gagica, ka bërë me dije njëherit se Këshilli Politik është një organ i ri i degës, i cili analizon, këshillon dhe rekomandon politika në nivel lokal, e tani edhe në atë regjional, duke nënvizuar se takimi i sotëm ishte produktiv, dhe si i tillë prodhoi diskutime të frytshme në interes të qytetarëve të tri komunave, përtej interesit të degëve të AAK-së.
“Pajtohemi unanimisht se AAK në Anamoravë është më ndryshe se që ishte kurdoherë më parë. Mbështetja për Aleancën nuk ka ardhur vetvetiu por duke u bazuar në qeverisjen dhe bashkëqeverisjen tonë në nivel lokal dhe nacional”, ka shtuar Gagica.
Kreu i degës së AAK-së në Gjilan, Nazim Gagica, në fund ka potencuar se ky subjekt “është shembulli më i mirë i qeverisjes së pastër, korrekte, zhvillimore dhe integruese”, duke paralajmëruar një takim të ngjashëm në Viti, në funksion të thellimit të bashkëpunimit të mëtejmë reciprok mes degeve rajonale te AAK-se.
