Aksidenti fatal i merr jetën Fatjon Bunjakut, ish-reprezentuesit të Kosovës U21
Një lajm i rëndë ka tronditur sot futbollin kosovar. Futbollisti Fatjon Bunjaku ka ndërruar jetë tragjikisht në moshën 22-vjeçare, si pasojë e një aksidenti.
Bunjaku, i cili së fundmi ishte pjesë e skuadrës së Elbasanit në Shqipëri, konsiderohej një prej futbollistëve të rinj me perspektivë. Gjatë karrierës së tij ai kishte veshur fanellat e Malishevës, Lirisë, Gjilanit dhe Trepçës, ndërsa ishte paraqitur edhe me Kombëtaren U21 të Kosovës.
Lajmi për vdekjen e tij u bë i ditur përmes një njoftimi të publikuar nga faqja zyrtare e fshatit Samadraxhë.
“Ka ndërruar jetë tragjikisht Fatjon Fatmir Bunjaku. Të nderuar bashkëvendas, ju njoftojmë që mbrëmë në një aksident tragjik ka ndërruar jetë Fatjon Fatmir Bunjaku. Për ditën dhe orën e varrimit do t’ju njoftojmë me kohë. Në emër të të gjithë banorëve të fshatit ju shprehim ngushëllime familjes Bunjaku”, thuhet në njoftim.
Ndarja e parakohshme nga jeta e Fatjon Bunjakut ka pikëlluar familjen, miqtë, bashkëlojtarët dhe mbarë komunitetin sportiv në Kosovë. Ndërkohë, priten reagime dhe mesazhe ngushëllimi nga klubet ku ai ka luajtur, si dhe nga institucionet e futbollit në vend.
Kujtimi për Fatjon Bunjakun do të mbetet i paharruar në mesin e atyre që e njohën dhe e vlerësuan si futbollist dhe si njeri.
