Fund tragjik për pesë jetët drejt Titanic-ut
Tragjik ishte përfundimi i kërkimit për Titan, gjurmët e të cilit humbën të dielën pranë rrënojave të Titanic-ut, pasi Roja Bregdetare e SHBA konfirmoi se rrënojat e gjetura i përkasin nëndetëses.
Këto janë të paktën pesë pjesë të ndryshme të nëndetëses fatale, të cilat ndodheshin në një distancë prej rreth 500 metrash nga mbytja e Titanic-ut, në fund të Atlantikut të Veriut.
“Mbetjet janë në përputhje me një humbje katastrofike të dhomës së presionit. Pas këtij konstatimi, ne njoftuam menjëherë familjet”, tha administratori e Gardës Bregdetare të SHBA-së, John Mauger, i cili drejton kërkimin për Titan.
Kundëradmirali shtoi se roja bregdetare donte t’u “shprehte ngushëllimet familjeve të atyre në bord”, ndërsa theksoi se robotët nënujorë do të qëndrojnë në vendngjarje për të mbledhur informacion.
Në të njëjtën kohë, ai nënvizoi se “nuk duket se ka ndonjë lidhje mes zhurmave të zbuluara gjatë misionit të kërkim-shpëtimit dhe pozicionit të tij në shtratin e detit”.
“Ne jemi mirënjohës për mobilizimin e shpejtë të ekspertëve në kërkimin dhe shpëtimin nënujor. Ne jemi gjithashtu jashtëzakonisht mirënjohës për gamën e plotë të ndihmës ndërkombëtare të ofruar”, shtoi ai.
Titan, 6.7 metra i gjatë, në pronësi të kompanisë me bazë në SHBA OceanGate Expeditions, filloi zhytjen e saj drejt mbytjes së Titanic-ut në orën 08:00 të mëngjesit të së dielës. Ai humbi kontaktin me anijen mbështetëse pas rreth një ore e 45 minutash, pak para se të arrinte në rrënojat e famshme në një zonë të largët të Atlantikut të Veriut.
Pesëshja në bordin e nëndetëses ishin: themeluesi amerikan OceanGate Stockton Rush 61-vjeçar, oqeanografi francez 77-vjeçar Paul-Henri Narzolet, miliarderi britanik 59-vjeçar Hamish Harding, biznesmeni pakistanez 48-vjeçar Shahzada Dawood dhe djalin e tij 19-vjeçar Sulejman.
