Forcat e FSK-së ndihmojnë familjet e rrezikuara nga vërshimet në Mitrovicë – Mehaj thotë se situata është nën kontroll
Mër shkak të gjendjes së rënduar si rezultat i vërshimeve, ministri i Mbrojtjes, Armend Mehaj, ka treguar se forcat e FSK-së kanë dalë në terren për të ndihmuar familjet që kanë nevojë.
Mehaj ka thënë se po u dalin në ndihmë qytetarëve, duke shtuar se në terren e ka takuar edhe kryetarin e komunës, Bedri Hamza me të cilin kanë diskutuar për koordinimin e veprimeve.
“Situata me vërshime në vendin tonë është nën kontrolll, me gjithë vështirësitë në terren ushtarët tanë me sukses po iu dalin në ndihmë qytetarëve tanë. Tani gjindem në Mitrovicë, u takuam me kryetarin e komunës, z. Bedri Hamza me të cilin diskutuam për masat që duhet të ndërmarrim, lajme të mira nga terreni ku niveli i ujit po bie dhe gjendja po qetësohet”, ka njoftuar Mehaj.
Ai ka thënë se forcat e ushtrisë janë në dispozicion të të gjithë qytetarëve që kanë nevojë.
“Gjithashtu, forcat tona janë në ndihmë dhe dispozicion të qytetarëve në Skenderaj, Istog dhe Klinë, gjithashtu e njoftova kryetarin e Komunës së Junikut që në rast nevoje jemi në gatishmëri të plotë. Ushtria jonë është këtu për ju!”, ka thënë në fund ai.
