Fatlinda Fejzullahu, gjilanasja e parë shofere e autobusit!
Është çështje ditësh kur Gjilani do të bëhet me shofere të autobusit, shkruan TV Gjilani!
Bëhet fjalë për 24-vjeçaren Fatlinda Fejzullahu nga lagjen “Dheu i Bardhë”, e cila është në fazën përfundimtare për të mbaruar me procedurat zyrtare drejt pajisjes me patent për vozitjen e autobusit – kategoria “D”!
TV Gjilani ka mësuar se Fatlinda së shpejti pritet të pajiset me këtë licencë pasi tashmë ka përfunduar orët e vozitjes dhe testin me shkrim.
Deri te leja për të administruar me timonin e autobusit, asaj i ka mbetur që t’i nënshtrohet vetëm testit të vozitjes, për ç’gjë ky fakt konsiderohet çështje e kryer, pasi eksperienca dhe shkathtësitë e saj në vozitje janë unike!
Sipas informatave, ndonëse jozyrtare, Fatlinda Fejzullahu do të jetë femra e parë nga Gjilani që do të pajiset me patent shoferi për autobus, kategoria “D”! – Kështu së paku besohet pasi nuk dihet mirëfilli të ketë një rast tjetër të ngjashëm, qoftë nga qytetaret rezidente në Gjilan apo bashkatdhetaret tona në botën e jashtme, e që janë me origjinë nga Gjilani, të cilët kanë patentë – shoferi të kategorisë “D”.
Vlenë të përmendet se Fatlinda Fejzullahu paraprakisht ka mbaruar Fakultetin e Infermierisë, ndërsa, përveç patentit të kategorisë “D”, me të cilin pritet të pajiset shumë shpejt, ajo zotëron të gjitha kategoritë tjera për automjete të të gjitha llojeve, duke filluar nga kategoria “A” për motoçikletë, për të vijuar me kategorinë “B”, e deri te kategoria “C”, për kamionetë, të cilën e ka mbaruar kohë më parë.
Këtij suksesi të saj, përveç entusiazmit e dëshirës personale, i ka kontribuar në masë të madhe edhe prindi i saj, i cili i ka qëndruar prapa në çdo kohë. Ai madje ka qenë udhërrëfyes e insistues që edhe fëmijët tjerë, dy motrat e Fatlindes dhe vëllau i saj, paralelisht me studimet, të kryejnë me sukses edhe lejet, për t’u pajisur me të gjitha kategoritë, “A”, “B” e “C”, ndërsa Fatlinda edhe kategorinë “D”.
