Faqja e MKRS-së: “Kosova është shtet i xhudos”
Faqja e Ministrisë për Kulturë, Rini e Sport me dedikim “extra” për xhudistët e sportin e xhudos në tërësi: shkruan, “Kosova është shtet i xhudos”.
Faqja e Ministrisë për Kulturë, Rini e Sport, në një postim informues ka vënë në pah edhe një herë përkushtimin institucional ndaj sportit të xhudos, pas sukseseve të arritura të xhudistëve kosovarë gjatë ditës së djeshme (e shtunë), në Kampionatin Europian në Xhudo që u mbajt në Prishtinë, ku fitoi 4 medalje, një të artë e tri të bronzta!
Njoftimi/postimi i plotë:
Mbi 40 xhudistë nga 26 shtete të Evropës morën pjesë në Kampionatin Evropian të Xhudos që për herë të parë u organizua në Kosovë.
Pallati i Rinisë dhe Sporteve në Prishtinë ishte përplot me sportdashës që kishin ardhur të shohin xhudistët e tyre të preferuar të cilët kësaj radhe po garonin në shtëpinë e tyre.
Në këtë kampionat xhudistët tanë dhanë emocion e krenari për të gjithë të pranishmit. Ata i sollën shtetit katër medalje, Akili medalje të artë dhe Distria, Nora e Dardani të bronztë.
Duke qenë ngjarja më e madhe e sportit të xhudos e organizuar ndonjëherë në Kosovë, u dëshmua edhe njëherë që vendi ynë ka aftësi në organizim të ngjarjeve të tilla sportive.
Ceremonia e hapjes së Kampionatit Evropian të Xhudos nisi me prezantimin e klipit “Kosova, shtet i xhudos” dhe me performancën e Ansamblit “Rugova”.
Të pranishëm në këtë ngjarje ishin presidentja Vjosa Osmani, kryeministri Albin Kurti, ministri i Sportit, Hajrulla Çeku, presidenti i Federatës së Xhudos së Kosovës, Agron Kuka, zëvendëspresidenti i Federatës Evropiane të Xhudos, Otto Kneitinger, përfaqësues të federatave sportive, ambasadorë të akredituar në Kosovë, ministra dhe deputetë.
Përgëzime për organizimin e mrekullueshëm Federatës së Xhudos së Kosovës, e cila u mbështetet nga Ministria e Kulturës, Rinisë dhe Sportit dhe Federata Evropiane e Xhudos.
