Etrit Berisha, superhero në Suedi! Dy penallti të pritura, një gol i shënuar dhe një trofe i ngritur lart
Nëse ka një ditë që Etrit Berisha nuk do ta harrojë kurrë, ajo është 29 maji 2025.
Në një finale të zjarrtë të Kupës së Suedisë së skuadrës së tij, Hacken ndaj kampionëve të Malmo, portieri shqiptar nuk u mjaftua vetëm me mbrojtjen e portës… ai hyri në histori.
Ndeshja? E tensionuar, pa gola gjatë kohës së rregullt dhe shtesës. Fituesi? Duhej të zgjidhej me ruletën dramatike të penalltive. Dhe aty, Berisha veshi mantelin e heroit.
Jo vetëm që priti dy penallti vendimtare, por edhe goditi vetë një 11-metërsh, me qetësi dhe saktësi klinike. Një portier që shënon dhe shpëton, një kombinim që rrallë shihet, por kur ndodh, mbetet për historinë.
Ky triumf nuk është vetëm një trofe për skuadrën e Hakenit. Është një rikthim i madh për vetë Berishën, i cili deri në muajin prill ishte pa ekip dhe në pritje të një shansi të fundit. Dhe kur ai shans erdhi, ai e ktheu në art. Kupa e Suedisë ka një emër mbi të sot: Etrit Berisha.
