Ekskluzive | Identifikohet grabitësi i marketit në Gjilan – 15-vjeçari përfundon në pranga, pranon krimin
Një grabitje e ndodhur mbrëmjen e djeshme në Gjilan është zbardhur brenda 24 orëve, pas një aksioni të shpejtë të hetuesve të Njësisë për Krime të Rënda.
Sipas informacioneve mediale, rasti ka ndodhur më 18 tetor 2025, rreth orës 18:30, në rrugën “Lufta e Gjilanit ’44”, ku një 15-vjeçar kishte hyrë në një market dhe nën kërcënimin e një thike kishte grabitur nga arka rreth 230 euro.
Pas hetimeve intensive në terren, policia ka arritur ta identifikojë dhe arrestojë të dyshuarin, i cili është A. M.
Gjatë kontrollit, policia ka sekuestruar thikën që dyshohet se është përdorur gjatë grabitjes.
I mituri është intervistuar në prani të avokatit dhe punëtorit të Qendrës për Punë Sociale, ku ka pranuar veprën penale.
Me urdhër të Prokurorit Kujdestar për Krime të Rënda, ndaj të dyshuarit është lëshuar aktvendim për ndalim 24-orësh, ndërsa hetimet po vazhdojnë për zbardhjen e plotë të rastit.
