Ekskluzive: Dr. Fatbardh Veseli ligjëron në Universitetin e Tiranës mbi inovacionin dhe sigurinë kibernetike
Një nga ekspertët shqiptarë në fushën e sigurisë kibernetike, Dr. Fatbardh Veseli, ka mbajtur një ligjëratë të veçantë në Universitetin e Tiranës, me temën “Inovacioni ndërmjet Teorisë dhe Praktikës: Fronti i Sigurisë Kibernetike”.
Ligjërata u fokusua në ndërlidhjen e modeleve teorike me zbatimin praktik në fushën e sigurisë kibernetike, duke theksuar rëndësinë e analizës shkencore për të kuptuar dhe ndërtuar inovacione të suksesshme në këtë sektor gjithnjë e më kritik.
Ndryshe nga formatet tradicionale, Veseli aplikoi një qasje interaktive, duke synuar përfshirjen aktive të studentëve në diskutim. Megjithëse fillimisht pati hezitim nga ana e studentëve, atmosfera ndryshoi ndjeshëm gjatë pjesës së dytë të ligjëratës, ku bashkëbisedimi dhe angazhimi u rritën dukshëm.
“Formati i ligjërimit ka po aq rëndësi sa përmbajtja, në mos edhe më shumë,” theksoi Veseli, duke reflektuar mbi përvojën e tij me studentët vitet e fundit.
Sipas tij, vlerësimet pozitive nga studentët konfirmojnë se një qasje e angazhuar dhe e menduar mirë arrin të tërheqë vëmendjen edhe në një kohë kur të rinjtë janë të ekspozuar ndaj një fluksi të madh informacioni.
Vizita në Tiranë nuk përfundon vetëm me këtë ligjëratë. Palët janë dakorduar për vazhdimin e bashkëpunimit në të ardhmen, përmes shkëmbimeve akademike dhe formateve të tjera profesionale.
Ky aktivitet u realizua në kuadër të projektit Diaspora4Innovation, i implementuar nga GERMIN, ku Dr. Veseli është i angazhuar si pjesë e rrjetit profesional.
Ky zhvillim konsiderohet një hap i rëndësishëm në forcimin e lidhjeve akademike dhe profesionale ndërmjet ekspertëve të diasporës dhe institucioneve arsimore në rajon.
