Dyshohet për vjedhje të rëndë dhe mashtrim, bie në prangat e Policisë një person në Gjilan
Një person është arrestuar dje në Gjilan, pasi i njëjti dyshohet se është përfshirë në katër raste të veprave penale ‘Mashtrim’ dhe ‘Vjedhje e rëndë’.
Përmes një komunikate për media, Policia njofton se i dyshuari është K.S., 32-vjeçar dhe ai dyshohet se rastet në fjalë i ka kryer gjatë muajit gusht.
“Njësiti i hetimeve të Stacionit Policor Gjilan me datën 15.08.2023 si rezultat i një pune mirë të organizuar operacionale dhe veprimeve hetimore ka arritur që të arrestojë dy të dyshuarin K.S. (viti i lindjes 1991, mashkull kosovar shqiptar). Arrestimi i tij është bërë pasi që për të njëjtin janë gjetur prova materiale se ka qenë i përfshirë së paku në katër raste të veprave penale si ,,Mashtrim’’ dhe ,,Vjedhje e rëndë’’ raste të cilat kanë ndodhur gjatë muajit gusht në qytetin e Gjilanit”, thuhet në njoftimin e Policisë.
I dyshuari është intervistuar në bazë të procedurave ligjore dhe me urdhër të Prokurorit të Shtetit ai është ndaluar për 48 orë.
