Dyshimet për manipulime në Mitrovicë, reagon KQZ: Gabim teknik
Komisioni Qendror i Zgjedhjeve ka reaguar pas shqetësimeve lidhur me procesin e verifikimit të rezultateve në Mitrovicë të Jugut, duke bërë të ditur se në disa dengje të fletëvotimeve është konstatuar një gabim teknik në kodin e vendvotimit.
Sipas KQZ, gabimi ka ndodhur gjatë shtypjes dhe është pranuar nga kompania përgjegjëse, e cila ka njoftuar se defekti mund të ketë ardhur nga printeri mekanik që vulos të dhënat variabile. Kompania do të dërgojë një sqarim zyrtar në ditët në vijim.
KQZ ka theksuar se numri i fletëvotimeve të shtypura është evidentuar saktë dhe se ky gabim nuk ndikon në integritetin e procesit të votimit apo numërimit, pasi fletëvotimet përmbajnë elemente të shumta sigurie.
E plotë:
Sqarim nga Komisioni Qendror i Zgjedhjeve
Prishtinë, 10 nëntor 2025 – Pas shqetësimeve të ngritura në opionin lidhur me zhvillimet gjatë procesit të verifikimit të rezultateve në Qendrën Komunale të Numërimit në komunën e Mitrovicës së Jugut, KQZ sqaron:
Bazuar në informatat e pranuara nga Komisionet Komunale të Zgjedhjeve në Gjakovë dhe Mitrovicë të Jugut, është konstatuar se në disa prej dengjeve të fletëvotimeve ka ndodhur një gabim në shtypjen e njërit prej elementeve të fletëvotimit, konkretisht në kodin e vendvotimit.
Në lidhje me këtë çështje, Komisioni Qendror i Zgjedhjeve ka komunikuar me kompaninë përgjegjëse për shtypjen e fletëvotimeve, e cila ka pranuar mundësinë që gabimi të ketë ndodhur në printerin mekanik që vulos të dhënat variabile. Kompania ka konfirmuar se në ditët në vijim do të përgatisë sqarim zyrtar lidhur me këtë rast.
Është me rëndësi të theksohet se numri i përgjithshëm i fletëvotimeve të shtypura është evidentuar saktë. Për më tepër, për secilin vendvotim, fletëvotimet e shtypura kanë numra serikë të shënuar në pjesët amë të fletëvotimeve, të cilët përputhen plotësisht me numrin e fletëvotimeve të pranuara dhe të verifikuara deri më tani në Qendrën Komunale të Mitrovicës së Jugut dhe Gjakovës.
Komisioni Qendror i Zgjedhjeve siguron publikun, votuesit dhe të gjithë akterët e përfshirë në procesin zgjedhor se ky gabim teknik nuk ndikon në asnjë mënyrë në integritetin e procesit të votimit apo të numërimit të votave, pasi fletëvotimet përmbajnë elemente të shumta sigurie që garantojnë se ato nuk mund të falsifikohen apo kopjohen.
